మహిషాసుర మర్దిని అలంకారంలో దర్శనమిచ్చిన అమ్మవార్లు
రొంపిచర్లలో ఘనంగా దేవీ శరన్నవరాత్రి ఉత్సవాలు.. ఆలయాల్లో ప్రత్యేక పూజలు
రొంపిచర్ల: మండలంలో దేవీ శరన్నవరాత్రి ఉత్సవాలు తొమ్మిదో రోజు సోమవారం ఘనంగా నిర్వహించారు. ఈ సందర్భంగా మండలంలోని వివిధ గ్రామాల్లో ఆలయాలను విద్యుత్ దీపాలతో అందంగా అలంకరించారు. అమ్మవార్లను మహిషాసుర మర్దిని అలంకారంలో ప్రత్యేకంగా అలంకరించి భక్తులకు దర్శనమిచ్చారు.
రొంపిచర్లలోని బ్యాంక్ సెంటర్‌లో ఉన్న శ్రీ వాసవి కన్యకా పరమేశ్వరి ఆలయంలో వాసవి అమ్మవారు, తూర్పు బజారులోని చౌడేశ్వరి దేవి ఆలయంలో చౌడేశ్వరి అమ్మవారు మహిషాసుర మర్దిని అలంకారంలో భక్తులను అనుగ్రహించారు. మండలంలోని పలు గ్రామాల్లోనూ అమ్మవార్లకు ప్రత్యేక అలంకరణలు చేసి పూజలు నిర్వహించారు.
ఉత్సవాల సందర్భంగా మహిళలు, భక్తులు పెద్ద సంఖ్యలో ఆలయాలను సందర్శించి అమ్మవార్లకు ప్రత్యేక పూజలు చేశారు. భక్తిశ్రద్ధలతో మొక్కులు చెల్లించుకున్నారు. ఆలయాల ప్రాంగణాల్లో భజన కార్యక్రమాలు నిర్వహించడంతో ఆధ్యాత్మిక వాతావరణం నెలకొంది.
రాత్రి వేళ ఆలయాల వద్ద లక్కీ డ్రా నిర్వహించి విజేతలకు బహుమతులు అందజేశారు. అనంతరం ఆలయాలకు వచ్చిన భక్తులకు తీర్థప్రసాదాలు పంపిణీ చేశారు.
