పొత్తులో సీట్ల లెక్కలు ఇంకా తేలలేదు.. తిరుగుబాటు అభ్యర్థులకు చంద్రబాబు హెచ్చరిక
జనసేనకు 30 శాతం, బీజేపీకి కనీసం 5 శాతం సీట్లు కేటాయించే అంశంపై చర్చలు
ఎన్ టుడే న్యూస్: స్థానిక సంస్థల ఎన్నికల్లో కూటమి పార్టీల మధ్య జెడ్పీటీసీ, ఎంపీటీసీ స్థానాల కేటాయింపుపై ఇంకా స్పష్టత రాలేదు. నామినేషన్ల ఉపసంహరణ గడువు సమీపిస్తున్న నేపథ్యంలో సీట్ల పంపకాలపై ఉత్కంఠ నెలకొంది. జనసేనకు 30 శాతం, బీజేపీకి కనీసం 5 శాతం స్థానాలు కేటాయించే అంశం చర్చలో ఉన్నట్లు సమాచారం.
సీట్ల పంపకాల విషయంలో స్థానిక నాయకత్వాలే బాధ్యత తీసుకుని, కూటమి పార్టీల మధ్య సమన్వయంతో నిర్ణయాలు తీసుకోవాలని సూచించినట్లు తెలుస్తోంది. స్థానిక పరిస్థితులు, అభ్యర్థుల బలాబలాలను పరిగణనలోకి తీసుకుని సమస్యలను పరిష్కరించుకోవాల్సిన బాధ్యత ఆయా ప్రాంతాల నాయకులపై ఉందని పార్టీ వర్గాలు పేర్కొంటున్నాయి.
తిరుగుబాటు అభ్యర్థులకు హెచ్చరిక
కూటమి అభ్యర్థులకు వ్యతిరేకంగా నామినేషన్లు వేసిన తిరుగుబాటు అభ్యర్థులు వాటిని ఉపసంహరించుకోవాలని ముఖ్యమంత్రి చంద్రబాబు నాయుడు హెచ్చరించినట్లు సమాచారం. పార్టీ నిర్ణయాలకు వ్యతిరేకంగా వ్యవహరిస్తే క్రమశిక్షణ చర్యలు తప్పవని టెలికాన్ఫరెన్స్‌లో స్పష్టం చేసినట్లు తెలుస్తోంది.
రాష్ట్రవ్యాప్తంగా 9,000కు పైగా ఎంపీటీసీ స్థానాలు, 650కు పైగా జెడ్పీటీసీ స్థానాలకు సంబంధించిన సీట్ల పంపకాలపై కూటమి నాయకత్వం దృష్టి సారించింది.
ఎన్నికల తర్వాతే కీలక పదవులపై నిర్ణయం
జిల్లా పరిషత్ చైర్‌పర్సన్, మండల పరిషత్ అధ్యక్షుడు (ఎంపీపీ) పదవుల కేటాయింపుపై ఎన్నికల అనంతరం నిర్ణయం తీసుకునే అవకాశం ఉన్నట్లు సమాచారం. స్థానిక సంస్థల్లో కూటమి ఐకమత్యాన్ని కాపాడుతూ, అభ్యర్థుల ఎంపిక నుంచి నామినేషన్ల ఉపసంహరణ వరకు సమన్వయంతో ముందుకు సాగాలని నాయకత్వం భావిస్తున్నట్లు తెలుస్తోంది.
అయితే, జెడ్పీటీసీ, ఎంపీటీసీ స్థానాల తుది కేటాయింపుపై అధికారిక స్పష్టత రావాల్సి ఉంది.
