రాయపట్నంలో పత్తి ఉత్పాదకత పెంపుపై రైతులకు శిక్షణ

యాసంగిలో తక్కువ నీటి పంటలకు ప్రాధాన్యం ఇవ్వాలి: మండల వ్యవసాయ అధికారి సాయిదీక్షిత్

ఖమ్మం జిల్లా మధిర మండలం రాయపట్నం గ్రామంలో జాతీయ పత్తి ఉత్పాదకత మిషన్‌లో భాగంగా రైతులకు శిక్షణ కార్యక్రమం నిర్వహించారు. ఈ సందర్భంగా మండల వ్యవసాయ అధికారి సాయిదీక్షిత్ పత్తి సాగులో ఆధునిక పద్ధతులు, దిగుబడి పెంపు, సమగ్ర సస్యరక్షణ చర్యలు, యాసంగి పంటల సాగుపై రైతులకు అవగాహన కల్పించారు. అధిక సాంద్రత పత్తి సాగు విధానంలో భాగంగా 90×15 సెంటీమీటర్ల దూరంతో మొక్కలు నాటడం ద్వారా నిర్ణీత విస్తీర్ణంలో మొక్కల సంఖ్యను పెంచుకోవచ్చని వివరించారు. పంట దశను బట్టి 40, 60 రోజుల సమయంలో వ్యవసాయ శాఖ సిఫార్సుల మేరకు వృద్ధి నియంత్రకాలను వినియోగించడం ద్వారా మొక్కల పెరుగుదలను నియంత్రించవచ్చని తెలిపారు. పంటను ఒకేసారి కోతకు అనుకూలంగా నిర్వహించడం ద్వారా కోత ఖర్చులను తగ్గించుకునే అవకాశం ఉందన్నారు. ఎల్‌నినో ప్రభావంతో వర్షపాతం, నీటి లభ్యతలో మార్పులు సంభవించే అవకాశం ఉన్నందున రైతులు యాసంగి సాగుకు ముందస్తు ప్రణాళికతో సిద్ధం కావాలని సూచించారు. నీటి లభ్యతను బట్టి పంటలను ఎంపిక చేసుకోవాలని, అధిక నీరు అవసరమయ్యే పంటల సాగును పరిమితం చేసి తక్కువ నీటితో పండే పంటలకు ప్రాధాన్యం ఇవ్వాలని తెలిపారు. భూమి స్వభావం, అందుబాటులో ఉన్న నీటి వనరులు, స్థానిక వాతావరణ పరిస్థితులను పరిగణనలోకి తీసుకొని శనగ, పెసర, మినుము వంటి పంటలను అనుకూలతను బట్టి సాగు చేయాలని సూచించారు. నీటిని పొదుపుగా వినియోగిస్తూ సాగు ఖర్చులను తగ్గించుకోవాలని, పంటల ఎంపికలో వ్యవసాయ శాఖ అధికారుల సలహాలు తీసుకోవాలని రైతులకు సూచించారు. ఈ కార్యక్రమంలో గ్రామ సర్పంచ్ గోపి, ఆత్మ డైరెక్టర్ గోపాల్ రావు, మండల వ్యవసాయ అధికారి సాయిదీక్షిత్, వ్యవసాయ విస్తరణ అధికారి, గ్రామ రైతులు పాల్గొన్నారు.