విదేశీ భారతీయులకు ఊరట.. UIDAI కొత్త ఫేస్ అథెంటికేషన్ SDK
ఆధార్ ధ్రువీకరణను మరింత సులభతరం చేసేలా కొత్త సాంకేతికత
న్యూఢిల్లీ | Ntoday News
విదేశాల్లో నివసిస్తున్న భారతీయులతో పాటు దేశంలో ఆధార్ ఆధారిత డిజిటల్ సేవలు వినియోగించే వారికి మరింత సౌకర్యం కల్పించే దిశగా యూనిక్ ఐడెంటిఫికేషన్ అథారిటీ ఆఫ్ ఇండియా (UIDAI) కీలక ముందడుగు వేసింది. ఆధార్ ఫేస్ అథెంటికేషన్‌ను వివిధ యాప్‌లలో నేరుగా అనుసంధానించుకునేలా కొత్త ఫేస్ అథెంటికేషన్ సాఫ్ట్‌వేర్ డెవలప్‌మెంట్ కిట్ (SDK)ను UIDAI అందుబాటులోకి తీసుకొచ్చింది.
కొత్త SDKతో బ్యాంకులు, ఫిన్‌టెక్, ఇన్సూరెన్స్ సంస్థలు తమ మొబైల్ యాప్‌లలోనే ఆధార్ ఆధారిత ఫేస్ వెరిఫికేషన్ సదుపాయాన్ని అనుసంధానించుకోవచ్చు. దీంతో వినియోగదారులు ధ్రువీకరణ కోసం ప్రత్యేక యాప్‌ల మధ్య మారాల్సిన అవసరం తగ్గుతుంది.
ప్రత్యేకంగా విదేశాల్లో ఉన్న భారతీయులు ఎదుర్కొనే జియోఫెన్సింగ్, యాప్‌ యాక్సెస్ వంటి సమస్యలను తగ్గించడంలో ఈ విధానం ఉపయోగపడే అవకాశం ఉంది. డిజిటల్ ఆన్‌బోర్డింగ్, KYC ప్రక్రియలను వేగంగా, సులభంగా నిర్వహించేందుకు ఈ సాంకేతికత దోహదపడుతుందని UIDAI పేర్కొంది.
కొత్త SDKతో పాటు సంస్థలు తమ ఇంటిగ్రేషన్‌ను ముందుగా పరీక్షించుకునేందుకు ఫేస్ అథెంటికేషన్ శాండ్‌బాక్స్, అమలుకు సంబంధించిన ప్లేబుక్‌ను కూడా UIDAI అందుబాటులోకి తెచ్చింది.
