నీరు, విద్యుత్‌ వినియోగాన్ని 20 శాతం తగ్గించాలి
- హైదరాబాద్ నగరవాసులకు జలమండలి సూచనలు
- ప్రభుత్వ కార్యాలయాల్లో సాయంత్రం 5 గంటల తర్వాత ఏసీలు నిలిపివేయాలని ఆదేశాలు
హైదరాబాద్ | ఎన్ టుడే న్యూస్‌:
రానున్న రోజుల్లో నీటి కొరత తీవ్రరూపం దాల్చే అవకాశం ఉందని హెచ్చరిస్తూ, హైదరాబాద్ నగరవాసులు నీరు, విద్యుత్‌ వినియోగాన్ని 20 శాతం తగ్గించుకోవాలని హైదరాబాద్ మెట్రోపాలిటన్‌ వాటర్‌ సప్లై అండ్‌ సీవరేజ్‌ బోర్డు (HMWSSB) సూచించింది. ఈ మేరకు జలమండలి ఎండీ అశోక్‌ ప్రజలకు పలు సూచనలు చేసినట్లు సమాచారం.
నీటి వృథాను అరికట్టడంతో పాటు విద్యుత్‌ వినియోగాన్ని తగ్గించేందుకు ప్రతి ఒక్కరూ బాధ్యతగా వ్యవహరించాలని సూచించారు. ముఖ్యంగా నీటిని అవసరమైన మేరకే వినియోగించాలని, అనవసరంగా కుళాయిలను తెరిచి ఉంచడం వంటి చర్యలకు దూరంగా ఉండాలని సూచించారు.
ప్రభుత్వ కార్యాలయాల్లో విద్యుత్‌ ఆదా చర్యలు చేపట్టాలని ఆదేశాలు జారీ చేసినట్లు సమాచారం. సాయంత్రం 5 గంటల తర్వాత ఏసీలను నిలిపివేయాలని, అత్యవసర పరిస్థితుల్లో ఏసీలు వినియోగించినా ఉష్ణోగ్రతను 25 డిగ్రీల సెల్సియస్‌ వద్ద ఉంచాలని సూచించారు.
అలాగే, ప్రభుత్వ ఉద్యోగులు కార్యాలయాల నుంచి ఇంటికి వెళ్లే ముందు లైట్లు, ఫ్యాన్లు, కంప్యూటర్లు సహా అవసరం లేని విద్యుత్‌ పరికరాలన్నింటినీ ఆపివేయాలని ఆదేశించినట్లు సమాచారం.
నీరు, విద్యుత్‌ ఆదా చర్యల్లో ప్రజలు, ప్రభుత్వ ఉద్యోగులు భాగస్వాములు కావాలని జలమండలి సూచించింది. రానున్న రోజుల్లో నీటి అవసరాలను దృష్టిలో ఉంచుకుని ఇప్పటి నుంచే పొదుపు చర్యలు పాటించాలని కోరింది.
