తిరువూరు గ్రంథాలయానికి రూ.17,500తో వాటర్ ట్యాంకులు, పైప్‌లైన్ ఏర్పాటు
విద్యార్థుల సౌకర్యార్థం జె. శ్రీలత సేవాభావం
తిరువూరు, అక్టోబర్ 21: పోటీ పరీక్షలకు సిద్ధమయ్యే విద్యార్థులకు మెరుగైన మౌలిక సదుపాయాలు కల్పించాలనే ఉద్దేశంతో తిరువూరు గ్రేడ్‌–1 శాఖా గ్రంథాలయంలో వాటర్ ట్యాంకులు, కుళాయిలు, పైప్‌లైన్ తదితర సౌకర్యాలను ఏర్పాటు చేశారు. గ్రంథాలయ సిబ్బంది జె. శ్రీలత తన వంతు సహకారంగా రూ.17,500 వెచ్చించి ఈ సదుపాయాలను కల్పించారు.
కృష్ణా జిల్లా గన్నవరం మండలం వీరపనేనిగూడెం గ్రామానికి చెందిన స్వర్గీయ బత్తుల అంజిరెడ్డి జ్ఞాపకార్థం ఆయన మనుమరాలు జె. శ్రీలత ఈ సేవా కార్యక్రమాన్ని చేపట్టారు. గ్రంథాలయానికి ప్రతిరోజూ తిరువూరుతో పాటు చుట్టుపక్కల గ్రామాల నుంచి అనేకమంది విద్యార్థినీ విద్యార్థులు వచ్చి పోటీ పరీక్షలకు సిద్ధమవుతున్నారు. ఇక్కడికి వచ్చే పాఠకులకు తాగునీరు, ఇతర అవసరాలకు ఇబ్బందులు కలగకూడదనే ఉద్దేశంతో గ్రంథాలయం కింది అంతస్తు, పై అంతస్తులో వాటర్ ట్యాంకులు, పైప్‌లైన్, పంపులు, కుళాయిలను ఏర్పాటు చేయించారు.
విద్యార్థుల అవసరాలను గుర్తించి గ్రంథాలయ అభివృద్ధికి ఆర్థిక సహకారం అందించడం అభినందనీయమని గ్రంథాలయ నిర్వాహకులు, పాఠకులు పేర్కొన్నారు. ఈ సదుపాయాలు పోటీ పరీక్షలకు సిద్ధమయ్యే విద్యార్థులతో పాటు గ్రంథాలయానికి వచ్చే ఇతర పాఠకులకు కూడా ఎంతో ఉపయోగకరంగా ఉంటాయని తెలిపారు. గ్రంథాలయ అభివృద్ధికి తోడ్పడిన జె. శ్రీలతకు అభినందనలు తెలియజేశారు.
ఈ కార్యక్రమానికి సంబంధించిన వివరాలను తిరువూరు గ్రేడ్‌–1 శాఖా గ్రంథాలయ నిర్వాహకులు సుంకర నాగేశ్వరరావు వెల్లడించారు.
