స్థానిక సంస్థల ఎన్నికలకు సిద్ధం కావాలి: ఎమ్మెల్యే భాష్యం ప్రవీణ్
అచ్చంపేట మండల నాయకులతో సమావేశం.. సమన్వయంతో ముందుకు సాగాలని సూచన
అచ్చంపేట: స్థానిక సంస్థల ఎన్నికలకు నాయకులు, కార్యకర్తలు సమాయత్తం కావాలని ఎమ్మెల్యే భాష్యం ప్రవీణ్ సూచించారు. స్థానిక సంస్థల ఎన్నికల్లో అనుసరించాల్సిన వ్యూహాలు, పార్టీ శ్రేణుల మధ్య సమన్వయం తదితర అంశాలపై అచ్చంపేట మండల నాయకులతో ఆయన సమావేశం నిర్వహించారు.
ఈ సందర్భంగా ఎమ్మెల్యే మాట్లాడుతూ ప్రతి గ్రామంలో నాయకులు, కార్యకర్తలు ఐక్యంగా పనిచేయాలని సూచించారు. ఎన్నికల సమయంలో పరస్పర సమన్వయంతో ముందుకు సాగుతూ పార్టీ విజయానికి కృషి చేయాలన్నారు. క్షేత్రస్థాయిలో ప్రజలతో నిరంతరం మమేకమవుతూ వారి సమస్యలను తెలుసుకోవాలని, వాటి పరిష్కారానికి చొరవ చూపాలని పేర్కొన్నారు.
కూటమి నాయకుల మధ్య సమన్వయం, పరస్పర సహకారం ఎంతో కీలకమని ఎమ్మెల్యే అన్నారు. నాయకులు, కార్యకర్తలు సమష్టిగా పనిచేస్తూ ప్రజలకు అందుబాటులో ఉండాలని సూచించారు. స్థానిక సంస్థల ఎన్నికలను దృష్టిలో ఉంచుకుని గ్రామస్థాయిలో పార్టీ శ్రేణులను సమన్వయం చేసుకుంటూ ముందుకు సాగాలని దిశానిర్దేశం చేశారు.
