మేమే ధర్నాకు దిగుతాం.. కేంద్రానికి సుప్రీంకోర్టు హెచ్చరిక
ఢిల్లీ హైకోర్టు సమీపంలో పాదచారుల భద్రతపై తీవ్ర ఆందోళన.. నవంబర్‌ 25లోగా చర్యలు తీసుకోవాలని స్పష్టం
న్యూఢిల్లీ: ఢిల్లీ హైకోర్టు సమీపంలో పాదచారుల కోసం సరైన ఫుట్‌పాత్‌లు, రోడ్డు దాటేందుకు సురక్షితమైన ఏర్పాట్లు లేకపోవడంపై సుప్రీంకోర్టు తీవ్ర అసంతృప్తి వ్యక్తం చేసింది. ఈ సమస్యను పరిష్కరించడంలో అధికారులు జాప్యం చేయడంపై ఆగ్రహం వ్యక్తం చేస్తూ, నిర్దేశించిన గడువులోగా చర్యలు తీసుకోకపోతే తామే హైకోర్టు ప్రధాన గేటు వద్ద ధర్నాకు కూర్చుంటామని కేంద్ర ప్రభుత్వాన్ని హెచ్చరించింది.
జస్టిస్‌ జేబీ పార్దివాలా, జస్టిస్‌ కేవీ విశ్వనాథన్‌లతో కూడిన ధర్మాసనం అక్టోబర్‌ 16న ఈ వ్యాఖ్యలు చేసింది. ఢిల్లీలోని మథురా రోడ్డుపై హైకోర్టు జంక్షన్‌, జాతీయ జంతుప్రదర్శనశాల సమీపంలో రోడ్డు దాటే సమయంలో పాదచారులు ఎదుర్కొంటున్న ప్రమాదాలపై విచారణ సందర్భంగా ఈ అంశాన్ని ప్రస్తావించింది.
ప్రతిరోజూ న్యాయవాదులు, కక్షిదారులు, పిల్లలు సహా వేలాది మంది ఈ ప్రాంతంలో రోడ్డు దాటుతున్నప్పటికీ, వారి భద్రతకు తగిన ఏర్పాట్లు లేకపోవడంపై ధర్మాసనం ఆందోళన వ్యక్తం చేసింది. పాదచారుల భద్రతకు సంబంధించిన సమస్యను కమిటీలు ఏర్పాటు చేయడంతోనే సరిపెట్టకుండా, క్షేత్రస్థాయిలో పనులు పూర్తి చేయాలని స్పష్టం చేసింది.
తదుపరి విచారణలోగా సమస్య పరిష్కారానికి స్పష్టమైన చర్యలు తీసుకోవాలని, లేకపోతే నవంబర్‌ 25న తామే హైకోర్టు ప్రధాన గేటు వద్ద ధర్నాకు కూర్చుంటామని ధర్మాసనం ఛలోక్తిగా వ్యాఖ్యానించినప్పటికీ, అధికారులకు గట్టి హెచ్చరిక చేసింది. అవసరమైతే సంబంధిత ఉన్నతాధికారులను కూడా పిలిపిస్తామని తెలిపింది.
రోడ్డు ఉన్నచోట పాదచారుల కోసం ఫుట్‌పాత్‌ ఉండాలనే సూత్రాన్ని అమలు చేయాల్సిన అవసరాన్ని సుప్రీంకోర్టు ఇప్పటికే ప్రస్తావించింది. పాదచారుల భద్రతను పట్టించుకోకుండా వాహనాల రాకపోకలకే ప్రాధాన్యం ఇవ్వడం సరికాదని పేర్కొంది.
ప్రజలు సురక్షితంగా నడవడానికి, రోడ్డు దాటడానికి అవసరమైన మౌలిక సదుపాయాలు కల్పించడం ప్రభుత్వ, సంబంధిత అధికారుల బాధ్యత అని ఈ విచారణ మరోసారి స్పష్టం చేసింది.
