యువతకు డ్రైవింగ్ లైసెన్సులు.. ఎమ్మెల్యే ప్రత్యేక చొరవ

యువతకు డ్రైవింగ్ లైసెన్సులు.. ఎమ్మెల్యే ప్రత్యేక చొరవ

చింతలపూడి: చింతలపూడి నియోజకవర్గ యువతకు ఎలాంటి దళారీల ప్రమేయం లేకుండా నేరుగా డ్రైవింగ్ లైసెన్సులు జారీ చేసే కార్యక్రమాన్ని త్వరలో ప్రారంభించనున్నట్లు ఎమ్మెల్యే సొంగా రోషన్ కుమార్ తెలిపారు.

బుధవారం నూజివీడు మోటార్ వెహికల్ ఇన్‌స్పెక్టర్ కృష్ణవేణితో సమావేశమైన ఎమ్మెల్యే, 18 సంవత్సరాలు పూర్తి చేసుకున్న యువతీ యువకులు డ్రైవింగ్ లైసెన్స్‌కు దరఖాస్తు చేసుకునేలా ప్రత్యేక చర్యలు చేపట్టాలని సూచించారు.

మండలాల వారీగా ప్రత్యేక శిబిరాలు నిర్వహించి దరఖాస్తులు స్వీకరించడం, రోడ్డు భద్రత నిబంధనలపై అవగాహన కల్పించడం, డ్రైవింగ్ లైసెన్స్ వల్ల కలిగే ప్రయోజనాలను వివరించడం, అర్హులైన వారికి లర్నర్స్ లైసెన్స్ (ఎల్‌ఎల్‌ఆర్) జారీ చేసేలా ఏర్పాట్లు చేయాలని అధికారులను ఆదేశించారు.

అలాగే మండలాల వారీగా అర్హులైన యువతీ యువకుల జాబితాలను సిద్ధం చేయాలని మండల విద్యాశాఖ అధికారులకు ఎమ్మెల్యే సూచించారు. ఈ కార్యక్రమం ద్వారా యువతకు పారదర్శకంగా, సులభంగా డ్రైవింగ్ లైసెన్సులు అందే అవకాశం కలుగనుంది.