రొంపిచర్లలో ఘనంగా దేవి శరన్నవరాత్రులు

ధనలక్ష్మీ, లలితా త్రిపుర సుందరీ దేవి అలంకారాల్లో దర్శనమిచ్చిన అమ్మవార్లు

రొంపిచర్ల: మండలంలో దేవి శరన్నవరాత్రి ఉత్సవాలు ఐదో రోజైన గురువారం ఘనంగా కొనసాగాయి. ఈ సందర్భంగా ఆలయాలను విద్యుత్ దీపాలతో అందంగా అలంకరించారు. భక్తులు, మహిళలు అధిక సంఖ్యలో ఆలయాలను సందర్శించి అమ్మవార్లకు ప్రత్యేక పూజలు నిర్వహించారు.

స్థానిక బ్యాంక్ సెంటర్‌లోని శ్రీ వాసవి కన్యకా పరమేశ్వరి దేవి ఆలయంలో అమ్మవారు ధనలక్ష్మీ అలంకారంలో భక్తులకు దర్శనమిచ్చారు. తూర్పు బజారులోని శ్రీ చౌడేశ్వరి దేవి ఆలయంలో అమ్మవారు లలితా త్రిపుర సుందరీ దేవి అలంకారంలో కొలువుదీరారు.

వాసవి కన్యకా పరమేశ్వరి దేవి ఆలయంలో ప్రత్యేక కుంకుమార్చన కార్యక్రమం నిర్వహించారు. ఈ కార్యక్రమంలో భక్తులు, మహిళలు అధిక సంఖ్యలో పాల్గొని అమ్మవారికి కుంకుమార్చన, అలంకరణ పూజలు చేశారు. రాత్రి వేళ భజన కార్యక్రమాలు నిర్వహించారు. అనంతరం ఆలయానికి వచ్చిన భక్తులకు తీర్థప్రసాదాలు పంపిణీ చేశారు.