Hanmakonda: పేదల పక్షాన పోరాటం కొనసాగిస్తా: దాస్యం వినయ్ భాస్కర్
వైఎస్ఆర్ నగర్ గుడిసెల వాసులు భయపడొద్దు.. వారికి అండగా ఉంటా – రేపు కాజీపేట ఎంఆర్ఓ కార్యాలయం వరకు ర్యాలీ
హనుమకొండ, నవంబర్ 1 (ఎన్ టుడే న్యూస్):
వైఎస్ఆర్ నగర్‌లో నివసిస్తున్న పేద గుడిసెల వాసులకు అండగా ఉంటానని, వారి హక్కుల కోసం పోరాటం కొనసాగిస్తానని ప్రభుత్వ మాజీ చీఫ్ విప్, మాజీ ఎమ్మెల్యే దాస్యం వినయ్ భాస్కర్ స్పష్టం చేశారు. పేదల సమస్యలపై చిత్తశుద్ధితో వ్యవహరించాలని, వారి జీవనాధారానికి నష్టం కలిగించవద్దని అన్నారు. వైఎస్ఆర్ నగర్ గుడిసెల వాసుల పట్ల కొందరు నాయకులు మొసలి కన్నీరు కారుస్తున్నారని విమర్శించారు.
మూడు దశాబ్దాలుగా నివాసం
మీడియాతో మాట్లాడిన వినయ్ భాస్కర్.. వైఎస్ఆర్ నగర్‌లో దాదాపు మూడు, నాలుగు దశాబ్దాలుగా పేదలు గుడిసెలు వేసుకుని నివసిస్తున్నారని తెలిపారు. అక్కడ దేవాలయాలు, రహదారులు, విద్యుత్ దీపాలు, తాగునీటి నల్లాలు సహా ప్రభుత్వాలు కల్పించిన మౌలిక వసతులు ఉన్నాయని పేర్కొన్నారు. రైల్వేలో పదవీ విరమణ చేసిన అధికారుల కోసం కూడా అక్కడ కార్యాలయం నిర్మించామని చెప్పారు.
సుమారు 30 ఏళ్ల క్రితం స్వర్గీయ ప్రణయ్ భాస్కర్, విజయ రామారావు, కడియం శ్రీహరి ఈ అర్బన్ సీలింగ్ భూమిలో బస్టాండ్ నిర్మించాలని ప్రతిపాదనలు పంపినట్లు గుర్తుచేశారు. 2014 ఎన్నికల సమయంలో తాను, అప్పటి ఎంపీ అభ్యర్థి కడియం శ్రీహరి గుడిసెల వాసులకు అండగా ఉంటామని హామీ ఇచ్చినట్లు తెలిపారు.
కడియం శ్రీహరిపై విమర్శలు
ప్రస్తుతం కడియం శ్రీహరి కాంగ్రెస్ పార్టీలో కొనసాగుతున్నారని ప్రస్తావిస్తూ.. వైఎస్ఆర్ నగర్ పేదల సమస్యల పరిష్కారంపై ఆయన తన నిబద్ధతను చాటుకోవాలని వినయ్ భాస్కర్ వ్యాఖ్యానించారు. గతంలో ఇచ్చిన హామీలకు అనుగుణంగా పేదలకు న్యాయం చేయాలని అన్నారు. కాంగ్రెస్ నాయకులే కాజీపేటలో వైఎస్ఆర్ పేరుతో గుడిసెలు ఏర్పాటు చేయించారని, ఇప్పుడు వారే భూ దోపిడీకి పాల్పడుతున్నారని ఆరోపించారు.
వైఎస్ఆర్ నగర్ సమీపంలోని కాంప్లెక్స్‌కు 15 ఏళ్లుగా రాని అనుమతులు, నాయిని రాజేందర్ రెడ్డి ఎమ్మెల్యే అయిన తర్వాత ఎలా వచ్చాయని ప్రశ్నించారు. తనపై వ్యక్తిగత విమర్శలు చేయడం కంటే ప్రజల సమస్యలపై చర్చకు రావాలని సవాల్ విసిరారు.
పేదలు భయపడొద్దు.. పోరాటానికి సిద్ధం
పోలీసులు తనను, తమ నాయకులను బెదిరిస్తున్నారని పార్టీ నాయకులు చెబుతున్నారని వినయ్ భాస్కర్ పేర్కొన్నారు. తెలంగాణ రాష్ట్ర సాధన కోసం లాఠీలు, తూటాలకు ఎదురొడ్డి పోరాడిన తమకు ఇలాంటి బెదిరింపులు కొత్త కాదన్నారు. అధికారులు ఎవరైనా చట్టవిరుద్ధంగా వ్యవహరిస్తే భవిష్యత్తులో తగిన సమాధానం చెబుతామని హెచ్చరించారు.
వైఎస్ఆర్ నగర్ గుడిసెల వాసుల సమస్యల పరిష్కారం కోసం మరుసటి రోజు వైఎస్ఆర్ నగర్ నుంచి కాజీపేట ఎంఆర్ఓ కార్యాలయం వరకు ర్యాలీ నిర్వహించనున్నట్లు ప్రకటించారు. కలిసి వచ్చే ప్రజా సంఘాలను కలుపుకొని గుడిసెల వాసుల పక్షాన పోరాడతామని తెలిపారు. ఏ ఒక్క గుడిసెల వాసి కూడా భయపడవద్దని, వారి పక్షాన తాను నిలబడి పోరాటం చేస్తానని భరోసా ఇచ్చారు.
నాయిని రాజేందర్ రెడ్డిపై మర్రి యాదవరెడ్డి ధ్వజం
ఈ కార్యక్రమంలో పాల్గొన్న కుడా మాజీ చైర్మన్ మర్రి యాదవరెడ్డి మాట్లాడుతూ నాయిని రాజేందర్ రెడ్డిపై విమర్శలు చేశారు. మూడేళ్లలో బాగానే సంపాదించుకున్నారని ఆరోపిస్తూ, పేదల స్థలాల జోలికి వస్తే వారి ఆవేదనకు గురికావాల్సి వస్తుందని వ్యాఖ్యానించారు. వైఎస్ఆర్ నగర్ ప్రజలు పేదలని, వారికి అండగా నిలవాలని సూచించారు.
ప్రజాప్రతినిధిగా ఎన్నికైన వ్యక్తి పేదలకు అండగా ఉండాలి తప్ప, పెద్దలకు కాదని అన్నారు. పేదల సమస్యలపై పోరాడే నాయకులను కించపరిచే వ్యాఖ్యలు చేయడం మానుకోవాలని హితవు పలికారు. కాజీపేట చౌరస్తాలోని కాంప్లెక్స్‌కు 15 ఏళ్లుగా రాని అనుమతులు ఎమ్మెల్యేగా నాయిని రాజేందర్ రెడ్డి ఎన్నికైన తర్వాత ఎలా వచ్చాయని ప్రశ్నించారు. గుడిసెల వాసులకు స్థలాలు కేటాయించి, పక్కా ఇళ్లు నిర్మించి ఇవ్వాలని డిమాండ్ చేశారు.
పలువురు నాయకుల పాల్గొనడం
ఈ కార్యక్రమంలో రాష్ట్ర కార్యవర్గ మాజీ సభ్యుడు నార్లగిరి రమేష్, మాజీ కార్పొరేటర్లు సంకు నర్సింగరావు, సోదా కిరణ్, తండమల్ల వేణు, డివిజన్ అధ్యక్షులు పాలడుగుల శివకుమార్, రంజిత్, ఆర్టీఏ మాజీ సభ్యుడు కాటాపూర్ రాజు, సీనియర్ నాయకులు సుంచు కృష్ణ, మర్యాల కృష్ణ, నయీంజుబేర్, అఫ్జల్, యాదగిరి, రఘు, ప్రభాకర్, ఎస్కే మహమూద్, రాబర్ట్, బాచి, బరిగెల వినయ్, శ్రీను, లీగల్ సెల్ బాధ్యుడు నాయిని రవి తదితరులు పాల్గొన్నారు.
