మీర్‌పేటలో మహిళ దారుణ హత్య

నోట్లో గుడ్డలు కుక్కి, కాళ్లు కట్టేసి హతమార్చిన దుండగులు.. నిందితుల కోసం పోలీసుల గాలింపు

మీర్‌పేట: రంగారెడ్డి జిల్లా మీర్‌పేట పోలీస్‌స్టేషన్ పరిధిలోని జిల్లెలగూడ దత్తునగర్‌లో దారుణ హత్య ఘటన వెలుగులోకి వచ్చింది. శ్రీలక్ష్మి రెసిడెన్సీలో నివాసం ఉంటున్న కేంద్ర ప్రభుత్వ ఉద్యోగి అరుణ్ కుమార్ భార్య అనిత (35)ను గుర్తుతెలియని దుండగులు హత్య చేశారు.

అందిన ప్రాథమిక సమాచారం ప్రకారం.. అనిత నోట్లో గుడ్డలు కుక్కి, కాళ్లు కట్టేసి దుండగులు హతమార్చినట్లు గుర్తించారు. ఆమె మృతదేహం రక్తపు మడుగులో పడి ఉండటాన్ని పిల్లలు గుర్తించారు. వెంటనే తండ్రికి సమాచారం అందించారు. దీంతో కుటుంబ సభ్యులు తీవ్ర దిగ్భ్రాంతికి గురయ్యారు.

సమాచారం అందుకున్న పోలీసులు ఘటనాస్థలికి చేరుకుని పరిశీలించారు. హత్యకు సంబంధించిన వివరాలను సేకరించి కేసు నమోదు చేశారు. అనితను ఎవరు, ఎందుకు హత్య చేశారు? ఈ ఘటన వెనుక ఉన్న కారణాలేమిటి? అనే కోణాల్లో దర్యాప్తు చేపట్టారు.

నిందితులను గుర్తించి పట్టుకునేందుకు పోలీసులు గాలింపు చర్యలు చేపట్టారు. ఈ ఘటనకు సంబంధించిన పూర్తి వివరాలు పోలీసుల దర్యాప్తులో వెల్లడికావాల్సి ఉంది.