సిక్కిం-నేపాల్ సరిహద్దులో భూకంపం.. రిక్టర్ స్కేలుపై 4.9 తీవ్రత నమోదు

 సిక్కిం-నేపాల్ సరిహద్దు ప్రాంతంలో గురువారం తెల్లవారుజామున భూకంపం సంభవించింది. తెల్లవారుజామున 4.30 గంటల సమయంలో భూమి ఒక్కసారిగా కంపించడంతో స్థానికులు ఆందోళనకు గురయ్యారు. నేషనల్ సెంటర్ ఫర్ సీస్మోలజీ వెల్లడించిన వివరాల ప్రకారం భూకంప తీవ్రత రిక్టర్ స్కేలుపై 4.9గా నమోదైంది. సిక్కింలోని యుక్సోమ్‌కు సుమారు 40 కిలోమీటర్ల వాయువ్య దిశలో భూకంప కేంద్రాన్ని గుర్తించారు. ప్రకంపనల ప్రభావం రాజధాని గ్యాంగ్‌టక్‌లోనూ స్వల్పంగా కనిపించింది. తెల్లవారుజామున నిద్రలో ఉన్న సమయంలో భూమి కంపించడంతో కొందరు ఇళ్ల నుంచి బయటకు వచ్చినట్లు సమాచారం. అయితే ఈ ఘటనలో ఎలాంటి ప్రాణనష్టం లేదా ఆస్తి నష్టం జరిగినట్లు ఇప్పటివరకు సమాచారం అందలేదు. భూకంప తీవ్రత మధ్యస్థంగా నమోదైనప్పటికీ సరిహద్దు ప్రాంత ప్రజలు అప్రమత్తంగా ఉండాలని అధికారులు సూచిస్తున్నారు.