విద్యుత్ షాక్‌తో మృతి చెందిన కుటుంబానికి ఎమ్మెల్యే వేముల వీరేశం ఆర్థిక సహాయం

వట్టిమర్తిలో జాల మనోజ్ మృతదేహానికి నివాళులర్పించిన ప్రభుత్వ విప్ వేముల వీరేశం

చిట్యాల: చిట్యాల మండలం వట్టిమర్తి గ్రామానికి చెందిన జాల మనోజ్ విద్యుత్ షాక్‌కు గురై మృతి చెందారు. ఈ విషయం తెలుసుకున్న ప్రభుత్వ విప్, నకిరేకల్ ఎమ్మెల్యే వేముల వీరేశం వట్టిమర్తి గ్రామానికి చేరుకుని మనోజ్ మృతదేహానికి పూలమాల వేసి నివాళులర్పించారు.

అనంతరం మృతుడి కుటుంబ సభ్యులను పరామర్శించి ఓదార్చారు. కుటుంబంలో చోటుచేసుకున్న విషాద ఘటన పట్ల ప్రగాఢ సానుభూతి వ్యక్తం చేశారు. ఈ కష్ట సమయంలో కుటుంబానికి అండగా ఉంటామని భరోసా కల్పిస్తూ తక్షణ ఆర్థిక సహాయంగా రూ.40,000 అందజేశారు.

యువకుడి మృతితో గ్రామంలో విషాద ఛాయలు అలుముకున్నాయి. కుటుంబ సభ్యులు, బంధుమిత్రులు తీవ్ర దుఃఖంలో మునిగిపోయారు. ఈ సందర్భంగా పలువురు గ్రామస్తులు మృతుడి కుటుంబానికి తమ సానుభూతి తెలియజేశారు.

ఈ కార్యక్రమంలో స్థానిక నాయకులు, ప్రజాప్రతినిధులు, కాంగ్రెస్ పార్టీ కార్యకర్తలు, బంధుమిత్రులు, గ్రామస్తులు పాల్గొన్నారు.