ఫిలిప్పీన్స్‌లో కుప్పకూలిన ప్రైవేట్ విమానం.. ఆరుగురు విదేశీయులు మృతి

డిగోస్ సిటీలో ఘటన.. సహాయక చర్యలు చేపట్టిన రెస్క్యూ బృందాలు

ఫిలిప్పీన్స్ (ఎన్ టుడే న్యూస్):

ఫిలిప్పీన్స్‌లో ఘోర విమాన ప్రమాదం చోటుచేసుకుంది. దవావో డెల్ సుర్ ప్రావిన్స్ పరిధిలోని డిగోస్ సిటీలో ఆరుగురు విదేశీ ప్రయాణికులతో బయలుదేరిన ఓ ప్రైవేట్ విమానం ఒక్కసారిగా కుప్పకూలింది. ఈ ప్రమాదంలో విమానం పూర్తిగా ధ్వంసమై, అందులో ప్రయాణిస్తున్న ఆరుగురు విదేశీయులు అక్కడికక్కడే ప్రాణాలు కోల్పోయినట్లు సమాచారం.

విమానం కూలిపోయిన ఘటనపై సమాచారం అందిన వెంటనే రెస్క్యూ బృందాలు సంఘటనా స్థలానికి చేరుకున్నాయి. సహాయక చర్యలు చేపట్టి ప్రమాదానికి సంబంధించిన వివరాలను సేకరిస్తున్నాయి. విమానంలో ప్రయాణిస్తున్న ఆరుగురి మృతిని ప్రాథమికంగా గుర్తించినప్పటికీ, ఈ ప్రమాదంలో మరెవరైనా ప్రాణాలు కోల్పోయారా అనే విషయంపై ఇంకా స్పష్టత రావాల్సి ఉంది.

మరోవైపు విమానం కూలిపోవడానికి గల కచ్చితమైన కారణాలు ఇంకా తెలియరాలేదు. సాంకేతిక లోపమా, ఇతర కారణాలా అనే కోణాల్లో అధికారులు దర్యాప్తు చేపట్టారు. ప్రమాదానికి సంబంధించిన పూర్తి వివరాలు అధికారికంగా వెల్లడికావాల్సి ఉంది.