స్వీట్ షాపులు, బేకరీల్లో ఫుడ్ సేఫ్టీ అధికారుల తనిఖీలు

38 ఆహార నమూనాల సేకరణ.. 20 సంస్థలకు మెరుగుదల నోటీసులు

తెలంగాణ | ఎన్ టుడే న్యూస్‌:

రాష్ట్రవ్యాప్తంగా స్వీట్ షాపులు, బేకరీలు, ఆహార తయారీ కేంద్రాల్లో అక్టోబర్ 23న తెలంగాణ ఫుడ్ సేఫ్టీ అధికారులు తనిఖీలు నిర్వహించారు. ఈ తనిఖీల్లో పలు చోట్ల అపరిశుభ్రత, ఆహార తయారీలో నిబంధనల ఉల్లంఘనలు గుర్తించారు.

కొన్ని కేంద్రాల్లో అపరిశుభ్రమైన నేలలు, పూడుకుపోయిన డ్రైనేజీలు ఉన్నట్లు అధికారులు గుర్తించారు. అలాగే గ్లౌజులు, హెయిర్‌నెట్లు ధరించకుండా ఆహార పదార్థాలను తయారు చేస్తున్న సిబ్బందిని గుర్తించినట్లు తెలిపారు.

38 ఆహార నమూనాల సేకరణ

కల్తీ జరిగిందనే అనుమానంతో అధికారులు మొత్తం 38 ఆహార నమూనాలను సేకరించి పరీక్షల కోసం పంపించారు. నిబంధనల్లో లోపాలు గుర్తించిన 20 సంస్థలకు మెరుగుదల నోటీసులు జారీ చేయగా, మరో సంస్థకు షోకాజ్ నోటీసు ఇచ్చారు.

ప్రస్తుతం ఆహార నమూనాలకు సంబంధించిన ప్రయోగశాల ఫలితాల కోసం అధికారులు ఎదురుచూస్తున్నారు. ఫలితాల ఆధారంగా తదుపరి చర్యలు తీసుకోనున్నారు. సంబంధిత సంస్థల్లో మరోసారి తనిఖీలు నిర్వహించి, ఆహార భద్రతా ప్రమాణాలు పాటిస్తున్నారా లేదా అన్నది పరిశీలించనున్నారు.