ఎన్నికలు జరగని 58 గ్రామపంచాయతీలకు గుడ్‌న్యూస్

కోర్టు కేసులు, ఇతర కారణాలతో ఎన్నికలు జరగని 58 గ్రామపంచాయతీలకు రాష్ట్ర ప్రభుత్వం అండగా నిలిచింది. ఎన్నికలు నిర్వహించలేదన్న కారణంతో కేంద్ర ఆర్థిక సంఘం నుంచి రావాల్సిన నిధులు నిలిచిపోవడంతో ఆయా గ్రామపంచాయతీలు ఆర్థిక ఇబ్బందులు ఎదుర్కొంటున్న నేపథ్యంలో ప్రభుత్వం కీలక నిర్ణయం తీసుకుంది.

గ్రామపంచాయతీలు నష్టపోకూడదన్న ఉద్దేశంతో మంత్రి సీతక్క ప్రత్యేక చొరవ తీసుకుని రాష్ట్ర ప్రభుత్వం నుంచి నిధులు విడుదల చేయించారు. ఇందులో భాగంగా 58 గ్రామపంచాయతీలకు మొత్తం రూ.33.62 కోట్ల నిధులను ప్రభుత్వం విడుదల చేసింది. ఈ నిధులు ఇప్పటికే ఆయా గ్రామపంచాయతీల ఖాతాల్లో జమ చేసినట్లు అధికారులు తెలిపారు.

ఎన్నికలు జరగలేదన్న కారణంతో గ్రామాల్లో అభివృద్ధి పనులు నిలిచిపోకూడదన్న ఉద్దేశంతో రాష్ట్ర ప్రభుత్వం ఈ నిర్ణయం తీసుకుంది. కేంద్ర ఆర్థిక సంఘం నిధులు అందకపోయినా గ్రామపంచాయతీల్లో అభివృద్ధి, మౌలిక వసతుల పనులకు నిధుల కొరత లేకుండా చర్యలు చేపట్టింది.