పవన్ కళ్యాణ్‌పై అనుచిత పోస్టులు.. గుంటూరు జిల్లాకు చెందిన వ్యక్తి అరెస్ట్

ఆంధ్రప్రదేశ్ ఉప ముఖ్యమంత్రి, జనసేన పార్టీ అధ్యక్షుడు పవన్ కళ్యాణ్‌పై సామాజిక మాధ్యమాల్లో అసభ్యకరమైన, అభ్యంతరకరమైన పోస్టులు చేసిన వ్యక్తిని పోలీసులు అరెస్ట్ చేశారు. గుంటూరు జిల్లా వడ్డేశ్వరానికి చెందిన రవీంద్రబాబును అదుపులోకి తీసుకుని విచారణ చేపట్టారు. పవన్ కళ్యాణ్ వ్యక్తిగత ప్రతిష్ఠకు భంగం కలిగించేలా పోస్టులు చేయడంతో పాటు, జనసేన పార్టీ కార్యకర్తలు, అభిమానులు, మద్దతుదారుల మధ్య విభేదాలు సృష్టించే విధంగా ప్రచారం సాగించారనే ఆరోపణలు ఉన్నాయి. ఈ వ్యవహారంపై పిఠాపురానికి చెందిన జనసేన నాయకులు పోలీసులకు ఫిర్యాదు చేశారు. ఫిర్యాదును పరిశీలించిన పోలీసులు కేసు నమోదు చేసి, దర్యాప్తులో భాగంగా రవీంద్రబాబును అరెస్ట్ చేసినట్లు సమాచారం. ఇదిలా ఉండగా, పవన్ కళ్యాణ్ వ్యక్తిగత జీవితాన్ని లక్ష్యంగా చేసుకుని సామాజిక మాధ్యమాల్లో అభ్యంతరకర వ్యాఖ్యలు, పోస్టులు చేస్తున్న మరికొందరిపైనా ఫిర్యాదులు అందినట్లు తెలుస్తోంది. ఈ తరహా పోస్టుల వ్యవహారంలో పలువురిపై కేసులు నమోదైనట్లు సమాచారం. సామాజిక మాధ్యమాల్లో వ్యక్తుల ప్రతిష్ఠకు భంగం కలిగించేలా, వ్యక్తిగత జీవితంపై అసభ్యకర వ్యాఖ్యలు చేస్తూ పోస్టులు పెడుతున్న వారిపై చట్టపరమైన చర్యలు తీసుకునే దిశగా పోలీసులు దృష్టి సారించారు. అయితే ఈ కేసులకు సంబంధించిన పూర్తి వివరాలు, తదుపరి పోలీసు చర్యలపై అధికారిక సమాచారం వెలువడాల్సి ఉంది.