స్టార్టప్‌లకు అంతర్జాతీయ గుర్తింపు తీసుకొచ్చేలా ఏపీ ప్రభుత్వం అడుగులు

మేధో సంపత్తి హక్కుల పరిరక్షణకు WIPO సహకారం కోరిన సీఎం చంద్రబాబు

రతన్ టాటా ఇన్నోవేషన్ హబ్ ద్వారా యువ పారిశ్రామికవేత్తలకు ప్రోత్సాహం విశాఖపట్నం: రాష్ట్రంలో ఆవిష్కరణలు, పరిశోధనలు, సృజనాత్మకతకు అంతర్జాతీయ స్థాయిలో గుర్తింపు తీసుకురావడంతో పాటు, యువతలో పారిశ్రామిక ఆలోచనలను ప్రోత్సహించే దిశగా ఆంధ్రప్రదేశ్ ప్రభుత్వం కీలక అడుగులు వేస్తోంది. స్టార్టప్ సంస్థలు, యువ పారిశ్రామికవేత్తలకు మేధో సంపత్తి హక్కులపై అవగాహన కల్పించేందుకు ప్రపంచ మేధో సంపత్తి సంస్థ (WIPO) సహకారం తీసుకోవాలని ముఖ్యమంత్రి చంద్రబాబు నాయుడు నిర్ణయించారు. ఈ మేరకు WIPO డైరెక్టర్ జనరల్ డారెన్ టాంగ్‌తో ముఖ్యమంత్రి సమావేశమై పలు అంశాలపై చర్చించారు. విశాఖపట్నంలో గురువారం నుంచి రెండు రోజుల పాటు జరగనున్న సీఐఐ భాగస్వామ్య సదస్సులో పాల్గొనేందుకు వచ్చిన ముఖ్యమంత్రి చంద్రబాబు, నోవోటెల్ హోటల్‌లో వివిధ సంస్థల ప్రతినిధులతో వరుస సమావేశాలు నిర్వహించారు. ఇందులో భాగంగా డారెన్ టాంగ్‌తో ప్రత్యేకంగా భేటీ అయ్యారు. రాష్ట్రంలో స్టార్టప్ వ్యవస్థను బలోపేతం చేయడం, ఆవిష్కరణలకు ప్రోత్సాహం అందించడం, పరిశోధనలకు తగిన గుర్తింపు కల్పించడం వంటి అంశాలపై చర్చించారు. WIPO–ఆంధ్రప్రదేశ్ అకాడమీ ఏర్పాటు చేసే అవకాశాలను పరిశీలించాలని ముఖ్యమంత్రి ప్రతిపాదించారు. ఈ భాగస్వామ్యం ద్వారా విద్యార్థులు, పరిశోధకులు, స్టార్టప్ వ్యవస్థాపకులు, సూక్ష్మ, చిన్న, మధ్యతరహా పరిశ్రమలకు మేధో సంపత్తి హక్కులు, పేటెంట్లు, వ్యాపార గుర్తులు, రూపకల్పనల నమోదు, సాంకేతిక పరిజ్ఞాన పరిరక్షణపై ప్రత్యేక శిక్షణ అందించాలని సూచించారు. తద్వారా రాష్ట్రంలో సరికొత్త ఆవిష్కరణలకు మరింత ప్రోత్సాహం లభించడంతో పాటు యువ పారిశ్రామికవేత్తలు తమ ఆలోచనలను వ్యాపార అవకాశాలుగా మార్చుకునేందుకు మార్గం సుగమం అవుతుందని వివరించారు. రాష్ట్రంలోని చేనేత, హస్తకళలు, సంప్రదాయ ఉత్పత్తులకు భౌగోళిక గుర్తింపు (జీఐ) సాధించడంతో పాటు, ఇప్పటికే గుర్తింపు పొందిన ఉత్పత్తులకు అంతర్జాతీయ మార్కెట్‌లో విస్తృత అవకాశాలు కల్పించాలని సీఎం కోరారు. స్థానిక ఉత్పత్తుల నాణ్యత, ప్రత్యేకతను ప్రపంచానికి పరిచయం చేసేలా వాటికి అంతర్జాతీయ స్థాయి గుర్తింపు, ప్రచారం కల్పించేందుకు WIPO సహకరించాలని విజ్ఞప్తి చేశారు. యువతలో నూతన ఆలోచనలను ప్రోత్సహించేందుకు రతన్ టాటా ఇన్నోవేషన్ హబ్ ద్వారా ప్రభుత్వం ప్రత్యేక కార్యక్రమాలు చేపడుతోందని చంద్రబాబు తెలిపారు. స్టార్టప్ సంస్థలకు అవసరమైన సహకారం, మార్గదర్శకత్వం, అవకాశాలు కల్పిస్తూ రాష్ట్రంలో బలమైన పారిశ్రామిక వ్యవస్థను నిర్మించడమే లక్ష్యమన్నారు. ఈ దిశగా రాష్ట్ర ప్రభుత్వంతో కలిసి పనిచేయాలని WIPO ప్రతినిధులను ఆహ్వానించారు. స్టార్టప్ వ్యవస్థ బలోపేతమే ప్రధాన లక్ష్యం రాష్ట్రంలో అమలు చేస్తున్న పారిశ్రామిక విధానాలు, పెట్టుబడులకు అనుకూలమైన వాతావరణం, సాంకేతిక రంగాల అభివృద్ధికి చేపడుతున్న చర్యలను ముఖ్యమంత్రి వివరించారు. ఆంధ్రప్రదేశ్‌ను మూడు ప్రాంతాలుగా విభజించి సమగ్ర అభివృద్ధి సాధించేలా కార్యాచరణ రూపొందించినట్లు తెలిపారు. కృత్రిమ మేధ, క్వాంటం సాంకేతికత వంటి ఆధునిక రంగాల్లో యువతకు నైపుణ్యాలు అందించి భవిష్యత్తు అవసరాలకు అనుగుణంగా సిద్ధం చేస్తున్నామని చెప్పారు. అమరావతి క్వాంటం కార్యక్రమంతో పాటు రాష్ట్రంలో సాంకేతిక అభివృద్ధికి తీసుకుంటున్న చర్యలను వివరించారు. ప్రైవేటు రంగంతో పాటు ప్రభుత్వ పాలనలోనూ సాంకేతిక పరిజ్ఞానాన్ని విస్తృతంగా వినియోగిస్తున్నామని, ప్రజలకు ప్రభుత్వ సేవలను మరింత వేగంగా, సులభంగా అందించేందుకు ఆధునిక విధానాలను అమలు చేస్తున్నామని పేర్కొన్నారు. పునరుత్పాదక ఇంధనం, అంతరిక్ష సాంకేతికత, క్వాంటం, సహజ వ్యవసాయం తదితర రంగాల్లో రాష్ట్రానికి విస్తృత పెట్టుబడి అవకాశాలు ఉన్నాయని వివరించారు. మహిళా సాధికారతకు ప్రభుత్వం అత్యంత ప్రాధాన్యత ఇస్తోందని, పది లక్షల మంది మహిళలను వ్యాపారవేత్తలుగా తీర్చిదిద్దడమే లక్ష్యంగా పనిచేస్తున్నామని చంద్రబాబు తెలిపారు. మహిళలు స్థానికంగా తయారు చేసే ఉత్పత్తులకు ‘స్వయం ఏపీ’ పేరుతో ప్రత్యేక గుర్తింపు కల్పిస్తూ మార్కెటింగ్ అవకాశాలు పెంచుతున్నామని చెప్పారు. మహిళా పారిశ్రామికవేత్తలకు మేధో సంపత్తి హక్కులపై అవగాహన కల్పించడంతో పాటు వారి ఉత్పత్తులకు అంతర్జాతీయ గుర్తింపు తీసుకురావడంలో WIPO భాగస్వామ్యం కావాలని కోరారు. ఈ సందర్భంగా డారెన్ టాంగ్ మాట్లాడుతూ ఆంధ్రప్రదేశ్‌లో పారిశ్రామికాభివృద్ధి కోసం నిర్వహిస్తున్న భాగస్వామ్య సదస్సులు అభినందనీయమని పేర్కొన్నారు. వివిధ రంగాలకు చెందిన ప్రముఖులు, సంస్థలను ఒకే వేదికపైకి తీసుకురావడం వల్ల కొత్త ఆలోచనలు, అవకాశాలపై అవగాహన పెరుగుతుందని అభిప్రాయపడ్డారు. క్వాంటం సాంకేతికత అభివృద్ధిలో ఆంధ్రప్రదేశ్ ముందంజలో ఉండేందుకు చేస్తున్న ప్రయత్నాలపై తమకు అవగాహన ఉందని, అమరావతి క్వాంటం కార్యక్రమం గురించి కూడా తెలుసునని తెలిపారు. రాష్ట్రంలో ఆవిష్కరణలు, సాంకేతిక అభివృద్ధికి చేపడుతున్న కార్యక్రమాలకు తమ వంతు సహకారం అందించే అవకాశాలపై సానుకూలంగా చర్చించారు. ఈ సమావేశంలో WIPO ప్రతినిధులు, రాష్ట్రంలోని వివిధ శాఖలకు చెందిన ఉన్నతాధికారులు పాల్గొన్నారు.