లోన్ యాప్ బాధితుడిని పరామర్శించిన జనసేన నేత డాక్టర్ రాజ్ కిరణ్
మంచిర్యాల: లోన్ యాప్ నిర్వాహకుల వేధింపులు తాళలేక ఆత్మహత్యాయత్నానికి పాల్పడిన మంచిర్యాలకు చెందిన యువకుడిని జనసేన పార్టీ పెద్దపల్లి, ఆదిలాబాద్ పార్లమెంట్ కో-ఆర్డినేటర్ డాక్టర్ రాజ్ కిరణ్ పరామర్శించారు. బాధితుడి ఆరోగ్య పరిస్థితిని అడిగి తెలుసుకుని, కుటుంబ సభ్యులకు ధైర్యం చెప్పారు.
ఈ సందర్భంగా డాక్టర్ రాజ్ కిరణ్ మాట్లాడుతూ.. ఆత్మహత్య ఏ సమస్యకూ పరిష్కారం కాదని, ఎన్ని కష్టాలు ఎదురైనా ధైర్యంగా వాటిని ఎదుర్కోవాలని సూచించారు. సమస్యలు ఎదురైనప్పుడు ఒంటరిగా బాధపడకుండా కుటుంబ సభ్యులు, స్నేహితులు లేదా నమ్మకమైన వ్యక్తుల సహాయం తీసుకోవాలని కోరారు. ఆపదలో ఉన్న బాధితులకు జనసేన పార్టీ అండగా ఉంటుందని తెలిపారు.
లోన్ యాప్‌ల పేరుతో కొందరు నిర్వాహకులు బెదిరింపులు, అసభ్యకర సందేశాలు పంపుతూ వ్యక్తిగత సమాచారాన్ని ఉపయోగించి బ్లాక్‌మెయిలింగ్‌కు పాల్పడుతున్నారనే ఆరోపణలపై ఆయన ఆందోళన వ్యక్తం చేశారు. ఇలాంటి వేధింపులకు పాల్పడేవారిపై పోలీసులు కఠిన చట్టపరమైన చర్యలు తీసుకోవాలని డిమాండ్ చేశారు.
వేధింపులకు వ్యతిరేకంగా సమాజం సమష్టిగా స్పందించాలని, బాధితులకు అండగా నిలిచి వారి ప్రాణాలను కాపాడేందుకు ప్రతి ఒక్కరూ బాధ్యతగా వ్యవహరించాలని డాక్టర్ రాజ్ కిరణ్ పిలుపునిచ్చారు.
