తిరుపతి హత్య కేసులో కీలక పరిణామం.. యువతి భాగ్యశ్రీగా గుర్తింపు

దుస్తులు, నగలను చూసి తమ కుమార్తెగా గుర్తించిన తల్లిదండ్రులు.. డీఎన్‌ఏ పరీక్షలకు సిద్ధం

తిరుపతి, నవంబర్ 3 (ఎన్ టుడే న్యూస్): తిరుపతి సమీపంలోని సి.మల్లవరం హైవే ప్రాంతంలో హత్యకు గురైన యువతి కేసులో కీలక పరిణామం చోటుచేసుకుంది. మృతురాలు చిత్తూరు జిల్లా రొంపిచర్ల మండలం లక్ష్మీనారాయణ కాలనీకి చెందిన వి. భాగ్యశ్రీ (26) అయి ఉండవచ్చని ఆమె తల్లిదండ్రులు అనుమానం వ్యక్తం చేశారు. మృతదేహంపై ఉన్న దుస్తులు, నగలను చూసి తమ కుమార్తెవేనని వారు గుర్తించినట్లు సమాచారం. అయితే మృతురాలి గుర్తింపును డీఎన్‌ఏ పరీక్షల ద్వారా నిర్ధారించాల్సి ఉంది.

సోషల్ మీడియాలో ఫొటో చూసి పోలీసులను ఆశ్రయించిన తల్లిదండ్రులు

గత నెల 31వ తేదీ రాత్రి సోషల్ మీడియాలో వైరల్ అయిన మృతదేహం ఫొటోను చూసిన తల్లిదండ్రులు తిరుపతి రూరల్ పోలీసులను సంప్రదించారు. తమ కుమార్తె భాగ్యశ్రీ అక్టోబర్ 30వ తేదీ రాత్రి నుంచి ఫోన్‌లో అందుబాటులో లేదని వారు పోలీసులకు తెలిపినట్లు సమాచారం.

తిరుపతిలో ప్రైవేట్ ఉద్యోగం

భాగ్యశ్రీ తిరుపతి ఎస్టీవీ నగర్‌లోని ఓ ప్రైవేట్ పీజీ హాస్టల్‌లో ఉంటూ ఎస్‌బీఐ క్రెడిట్ కార్డులకు సంబంధించిన ఒప్పంద ఉద్యోగిగా పనిచేస్తున్నట్లు కుటుంబ సభ్యులు తెలిపారు. ఆమె తల్లిదండ్రులు వేణుగోపాల్, లక్ష్మీదేవి చిత్తూరు జిల్లా రొంపిచర్ల మండలం లక్ష్మీనారాయణ కాలనీకి చెందినవారు.

డీఎన్‌ఏ పరీక్షలకు తల్లి సిద్ధం

తండ్రి వేణుగోపాల్ ఇచ్చిన ఫిర్యాదు మేరకు తిరుపతి రూరల్ పోలీసులు క్రైమ్ నంబర్ 383/2026 కింద కేసు నమోదు చేసినట్లు సమాచారం. మృతురాలి గుర్తింపును నిర్ధారించేందుకు డీఎన్‌ఏ పరీక్షలు నిర్వహించాల్సి ఉండగా, ఇందుకు తల్లి లక్ష్మీదేవి సిద్ధంగా ఉన్నట్లు తెలుస్తోంది.

నిందితుడి కోసం పోలీసుల గాలింపు

ఈ హత్య కేసులో నిందితుడిని గుర్తించి పట్టుకునేందుకు తిరుపతి రూరల్ సీఐ మద్దయ్య చారి నేతృత్వంలోని పోలీసు బృందం దర్యాప్తు కొనసాగిస్తోంది. ఘటనకు సంబంధించిన పూర్తి వివరాలు, హత్యకు గల కారణాలు పోలీసుల విచారణలో వెల్లడికావాల్సి ఉంది.