దీపావళి టపాసుల దుకాణాలకు పోలీసుల అనుమతి తప్పనిసరి

నిబంధనలు ఉల్లంఘిస్తే కఠిన చర్యలు తప్పవు చాట్రాయి ఎస్సై డి. రామకృష్ణ హెచ్చరిక

చాట్రాయి, నవంబర్ 3 (ఎన్ టుడే న్యూస్): దీపావళి పండుగను పురస్కరించుకొని మండలంలోని వివిధ గ్రామాల్లో టపాసుల దుకాణాలు ఏర్పాటు చేసే వ్యాపారులు తప్పనిసరిగా పోలీసుల అనుమతి పొందాలని చాట్రాయి ఎస్సై డి. రామకృష్ణ సూచించారు. ఈనెల 8వ తేదీన దీపావళి పండుగ జరగనున్న నేపథ్యంలో టపాసుల విక్రయదారులు ముందస్తుగా అవసరమైన లైసెన్సులు పొందాలని స్పష్టం చేశారు. టపాసుల దుకాణాల వద్ద అగ్నిప్రమాదాల నివారణకు అవసరమైన భద్రతా చర్యలు తప్పనిసరిగా చేపట్టాలని సూచించారు. దుకాణాల వద్ద నీటి డ్రమ్ములు, ఇసుక బకెట్లు, అగ్నిమాపక పరికరాలను అందుబాటులో ఉంచుకోవాలని తెలిపారు. నివాస ప్రాంతాలకు దూరంగా, నిబంధనలకు అనుగుణమైన ప్రదేశాల్లోనే టపాసుల దుకాణాలను ఏర్పాటు చేసుకోవాలని సూచించారు. పోలీసుల అనుమతి లేకుండా దుకాణాలు ఏర్పాటు చేసినా, భద్రతా నిబంధనలు ఉల్లంఘించినా కఠిన చర్యలు తీసుకుంటామని ఎస్సై డి. రామకృష్ణ హెచ్చరించారు. ప్రజలంతా భద్రతా నియమాలు పాటిస్తూ దీపావళి పండుగను ఆనందోత్సాహాలతో జరుపుకోవాలని ఆయన కోరారు.