మ్యాన్‌స్పియర్‌ భావజాలంతో మానసిక ఆరోగ్యానికి ముప్పు
యువకులు, బాలుర ఆలోచనా విధానంపై ప్రతికూల ప్రభావం.. మహిళలపై హింస పెరిగే ప్రమాదం
సోషల్‌ మీడియాలో వేగంగా విస్తరిస్తున్న ఆన్‌లైన్‌ గ్రూపులపై పరిశోధకుల హెచ్చరిక
సోషల్‌ మీడియాలో వేగంగా విస్తరిస్తున్న ‘మ్యాన్‌స్పియర్‌’ భావజాలం పురుషుల మానసిక ఆరోగ్యంతో పాటు సమాజంపై కూడా ప్రతికూల ప్రభావం చూపే ప్రమాదం ఉందని పరిశోధకులు హెచ్చరిస్తున్నారు. పురుషుల హక్కుల పరిరక్షణ పేరుతో మహిళలపై ద్వేషపూరిత భావాలను ప్రోత్సహించే ఆన్‌లైన్‌ గ్రూపులు, కమ్యూనిటీల సముదాయాన్ని సాధారణంగా ‘మ్యాన్‌స్పియర్‌’గా పిలుస్తారు.
మహిళల స్వేచ్ఛ, ఫెమినిజం కారణంగానే పురుషులకు అన్యాయం జరుగుతోందంటూ ఈ గ్రూపులు ప్రచారం చేస్తున్నాయని పరిశోధకులు పేర్కొంటున్నారు. ఇలాంటి ప్రచారాలు ముఖ్యంగా యువకులు, బాలుర ఆలోచనా విధానంపై ప్రతికూల ప్రభావం చూపుతున్నాయని ఆందోళన వ్యక్తం చేస్తున్నారు.
మానసిక ఆరోగ్యంపై ప్రభావం
మ్యాన్‌స్పియర్‌ భావజాలం కారణంగా పురుషుల్లో మానసిక సమస్యలు, ఒంటరితనం, సహాయం కోరడంపై సంకోచం వంటి సమస్యలు మరింత పెరిగే అవకాశం ఉందని అధ్యయనం సూచిస్తోంది. మానసిక ఇబ్బందులతో బాధపడుతూ సహాయం పొందాలనుకునే పురుషులు, బాలురు కూడా ఈ భావజాలం ప్రభావంతో వెనక్కి తగ్గే ప్రమాదం ఉందని పరిశోధకులు అభిప్రాయపడుతున్నారు.
అంతేకాకుండా మహిళల పట్ల ద్వేషపూరిత ఆలోచనలు పెరగడం వల్ల వారిపై వివక్ష, వేధింపులు, హింసకు దారితీసే పరిస్థితులు ఏర్పడవచ్చని హెచ్చరిస్తున్నారు.
ప్రజారోగ్య సమస్యగా పరిగణించాలి
మ్యాన్‌స్పియర్‌ ప్రభావాన్ని కేవలం సోషల్‌ మీడియాకు పరిమితమైన సమస్యగా చూడకూడదని, ప్రజారోగ్య సమస్యగా పరిగణించి సమగ్ర చర్యలు చేపట్టాలని ‘ది లాన్సెట్‌’ నివేదిక సూచించినట్లు పరిశోధకులు పేర్కొంటున్నారు. యువతలో ఆరోగ్యకరమైన లింగ సమానత్వ భావనలు పెంపొందించడం, మానసిక ఆరోగ్యంపై అవగాహన కల్పించడం, ఆన్‌లైన్‌లో ద్వేషపూరిత ప్రచారాన్ని ఎదుర్కోవడం వంటి చర్యలు అవసరమని అభిప్రాయపడుతున్నారు.
డిజిటల్‌ ప్రపంచంలో యువతపై ప్రభావం చూపుతున్న ఇలాంటి భావజాలాలపై కుటుంబాలు, విద్యాసంస్థలు, సామాజిక సంస్థలు, ప్రజారోగ్య నిపుణులు సమన్వయంతో దృష్టి సారించాల్సిన అవసరం ఉందని పరిశోధకులు సూచిస్తున్నారు.
