అభివృద్ధిని కాంక్షించే ఓటర్లు కూటమికి మద్దతుగా నిలుస్తున్నారు

నూజివీడును సుందర నగరంగా తీర్చిదిద్దుతాం మంత్రి కొలుసు పార్థసారథి

నూజివీడు, నవంబర్ 1: నూజివీడు పట్టణ అభివృద్ధిని కాంక్షించే ఓటర్లు కూటమి ప్రభుత్వానికి మద్దతుగా నిలుస్తున్నారని, మున్సిపల్ ఎన్నికల్లో కూటమి అభ్యర్థులు భారీ మెజారిటీతో విజయం సాధిస్తారని రాష్ట్ర మంత్రి కొలుసు పార్థసారథి ధీమా వ్యక్తం చేశారు. నూజివీడు పట్టణంలోని 18వ వార్డు, రెండో పోలింగ్ కేంద్రంలో మంత్రి తన ఓటు హక్కును వినియోగించుకున్నారు. అనంతరం పత్రికా ప్రతినిధులతో మాట్లాడుతూ రాష్ట్రంలో ప్రశాంత వాతావరణంలో ఎన్నికలు నిర్వహించేందుకు భద్రతాపరమైన పలు చర్యలు చేపట్టినట్లు తెలిపారు. విజ్ఞులైన ఓటర్లు గత ప్రభుత్వ పాలనను, ప్రస్తుత ప్రభుత్వ హయాంలో జరుగుతున్న అభివృద్ధిని బేరీజు వేసుకుని పట్టణ ప్రగతికి ప్రాధాన్యం ఇస్తారని ఆశాభావం వ్యక్తం చేశారు. నూజివీడు మున్సిపల్ ఎన్నికల్లో విజయం సాధించే కౌన్సిలర్ అభ్యర్థులు, చైర్మన్ అభ్యర్థి పట్టణ అభివృద్ధే ప్రధాన లక్ష్యంగా పనిచేస్తారని పేర్కొన్నారు. పట్టణంలో ప్రజలకు అవసరమైన మౌలిక సదుపాయాలను కల్పించి, నూజివీడును సుందర నగరంగా తీర్చిదిద్దేందుకు కృషి చేస్తామని స్పష్టం చేశారు. పట్టణ భవిష్యత్తును దృష్టిలో ఉంచుకుని ప్రతి ఓటరు తమ పవిత్రమైన ఓటు హక్కును తప్పనిసరిగా వినియోగించుకోవాలని మంత్రి కొలుసు పార్థసారథి కోరారు. ఈ కార్యక్రమంలో కౌన్సిలర్ అభ్యర్థి ముత్యాల కామేష్ తదితరులు పాల్గొన్నారు.