మురసు తుఫాను హెచ్చరికలు.. వరి కోతలు మూడు రోజులు వాయిదా వేసుకోండి రైతులకు మండల వ్యవసాయ అధికారి బి. శివశంకర్ సూచన

ఎన్ టుడే న్యూస్: ఏలూరు జిల్లా, నూజివీడు నియోజకవర్గం, చాట్రాయి మండలంలోని రైతులు వాతావరణ పరిస్థితులను దృష్టిలో ఉంచుకొని అప్రమత్తంగా ఉండాలని మండల వ్యవసాయ అధికారి బి. శివశంకర్ సూచించారు. మురసు తుఫాను ప్రభావంతో భారీ వర్షాలు కురిసే అవకాశం ఉందని వాతావరణ శాఖ హెచ్చరికలు జారీ చేసిన నేపథ్యంలో రైతులు మరో మూడు రోజుల పాటు వరి కోతలను వాయిదా వేసుకోవడం మంచిదని తెలిపారు. వర్షాల కారణంగా పంట నష్టపోకుండా ముందస్తు జాగ్రత్తలు తీసుకోవాలని సూచించారు. పొలాల్లో అధికంగా వర్షపు నీరు నిల్వ ఉంటే కాలువల ద్వారా బయటకు పంపించే ఏర్పాట్లు చేసుకోవాలని కోరారు. ఇప్పటికే కోతలు పూర్తిచేసి పొలాల్లో లేదా కల్లాల్లో ఉంచిన ధాన్యం తడవకుండా టార్పాలిన్లతో పూర్తిగా కప్పి భద్రపరచుకోవాలని సూచించారు. తుఫాను ప్రభావం తగ్గేవరకు రైతులు అప్రమత్తంగా ఉండి, పంట నష్టాన్ని నివారించేందుకు వ్యవసాయ శాఖ సూచనలు పాటించాలని మండల వ్యవసాయ అధికారి బి. శివశంకర్ విజ్ఞప్తి చేశారు.