పెళ్లికాని యువకులకు మద్యం నిషేధం..

పెళ్లికాని యువకులకు మద్యం నిషేధం.. ఉల్లంఘిస్తే రూ.5 వేల జరిమానా!

తమిళనాడులోని ఓ మత్స్యకార గ్రామంలో వినూత్న నిర్ణయం

తమిళనాడులోని విలుండమావడి గ్రామంలో మద్యపానాన్ని నియంత్రించేందుకు మత్స్యకార సంఘం పెద్దలు వినూత్న నిర్ణయం తీసుకున్నారు. ముఖ్యంగా పెళ్లికాని యువకులు మద్యం సేవించకుండా కట్టడి చేయాలని నిర్ణయించారు. మద్యం తాగుతూ పట్టుబడిన పెళ్లికాని యువకుడికి రూ.5 వేల జరిమానా విధించనున్నట్లు ప్రకటించారు.

అంతేకాకుండా నిబంధనను ఉల్లంఘిస్తున్న యువకుల గురించి సంఘం పెద్దలకు సమాచారం అందించిన వారికి రూ.2 వేల నగదు బహుమతి ఇవ్వనున్నట్లు తెలిపారు. గ్రామంలోని యువత మద్యానికి బానిస కాకుండా వారి భవిష్యత్తును కాపాడటంతో పాటు గ్రామంలో ప్రశాంత వాతావరణాన్ని కొనసాగించడమే ఈ నిర్ణయం ఉద్దేశమని సంఘం పెద్దలు వెల్లడించారు.

అయితే పెళ్లైన పురుషులకు మాత్రం మద్యం సేవించడంపై పూర్తిస్థాయి నిషేధం విధించలేదు. వారు మద్యం సేవించి గ్రామంలో గొడవలు సృష్టిస్తే మాత్రం రూ.5 వేల జరిమానా విధిస్తామని హెచ్చరించారు.

యువతను చెడు అలవాట్లకు దూరంగా ఉంచేందుకు గ్రామ పెద్దలు తీసుకున్న ఈ నిర్ణయం ప్రస్తుతం ఆసక్తికరంగా మారింది. మద్యపానం వల్ల కుటుంబాలు, యువత భవిష్యత్తు దెబ్బతినకుండా సామాజిక కట్టుబాట్లతో నియంత్రణ తీసుకురావాలన్న ప్రయత్నంగా దీనిని స్థానికులు అభివర్ణిస్తున్నారు.