సోనియాగాంధీ ఆత్మకథతో సినిమా తీస్తా: జగ్గారెడ్డి

సోనియాగాంధీ ఆత్మకథతో సినిమా తీస్తా: జగ్గారెడ్డి

సోనియమ్మ జీవిత ప్రస్థానాన్ని వెండితెరపై ఆవిష్కరిస్తా

సోనియాగాంధీ జీవిత చరిత్ర ఆధారంగా సినిమా నిర్మించాలనే తన ఆలోచనను కాంగ్రెస్ నాయకుడు జగ్గారెడ్డి వెల్లడించారు. సోనియాగాంధీ రాజకీయ ప్రస్థానం, త్యాగం, సేవాభావం, దేశ రాజకీయాల్లో ఆమె పోషించిన పాత్రను ప్రజలకు తెలియజేసేలా సినిమా రూపొందించాలని భావిస్తున్నట్లు తెలిపారు.

సంగారెడ్డి, నవంబర్ 11 (తొవ్వ ప్రతినిధి): సోనియాగాంధీ ఆత్మకథ ‘బీలాంగింగ్: ఎ జర్నీ ఆఫ్ లవ్’ ఆధారంగా తెలుగులో సినిమా నిర్మిస్తానని టీపీసీసీ వర్కింగ్ ప్రెసిడెంట్ జగ్గారెడ్డి ప్రకటించారు. బుధవారం సంగారెడ్డిలో నిర్వహించిన కాంగ్రెస్ కార్యకర్తల సమావేశంలో ఆయన ఈ ప్రకటన చేశారు.

ఈ సినిమాకు సంగారెడ్డి నియోజకవర్గ కాంగ్రెస్ నాయకులు, కార్యకర్తలే నిర్మాతలుగా వ్యవహరిస్తారని తెలిపారు. ఇందుకోసం ప్రత్యేక కమిటీ ఏర్పాటు చేసి నిర్మాణ పనులు ప్రారంభిస్తానన్నారు. ముఖ్యమంత్రి రేవంత్ రెడ్డి, పీసీసీ అధ్యక్షుడు మహేశ్ కుమార్ గౌడ్ చేతుల మీదుగా సినిమా షూటింగ్ ప్రారంభిస్తానని వెల్లడించారు.

ఇందిరాగాంధీ కోడలిగా, మాజీ ప్రధాని రాజీవ్ గాంధీ భార్యగా, రాహుల్, ప్రియాంక గాంధీల తల్లిగా సోనియాగాంధీ సాగించిన జీవిత ప్రయాణాన్ని సినిమాలో చూపిస్తానని చెప్పారు. ప్రధాని పదవి చేపట్టే అవకాశం ఉన్నప్పటికీ మన్మోహన్ సింగ్‌కు ఆ బాధ్యతలు అప్పగించడం ఆమె రాజకీయ జీవితంలో ప్రత్యేక ఘట్టమని పేర్కొన్నారు. సోనియాగాంధీ త్యాగాలు, రాజకీయ ప్రస్థానాన్ని ప్రజలకు తెలియజేయడమే సినిమా ప్రధాన ఉద్దేశమని జగ్గారెడ్డి వివరించారు.