కాకర్లలో పోలీసుల కవాతు.. ప్రశాంత పంచాయతీ ఎన్నికల నిర్వహణకు చర్యలు

తిరువూరు, నవంబర్ 11: రాబోయే గ్రామ పంచాయతీ ఎన్నికలను ప్రశాంత వాతావరణంలో నిర్వహించడంతో పాటు ప్రజల్లో భద్రతా భావాన్ని కల్పించే లక్ష్యంతో ఎన్టీఆర్ జిల్లా తిరువూరు మండలం కాకర్ల గ్రామంలో బుధవారం సాయంత్రం పోలీసులు కవాతు నిర్వహించారు. ఎన్టీఆర్ పోలీస్ కమిషనరేట్ కమిషనర్ రాజశేఖర్ బాబు ఐపీఎస్ ఆదేశాల మేరకు, రూరల్ డీసీపీ బి. లక్ష్మీనారాయణ ఐపీఎస్, మైలవరం ఏసీపీ పి. రామచంద్రరావు సూచనలతో ఈ కార్యక్రమం చేపట్టారు. తిరువూరు సర్కిల్ ఇన్‌స్పెక్టర్ జి. గురు ప్రకాష్ నేతృత్వంలో పోలీసు సిబ్బంది గ్రామంలోని ప్రధాన వీధుల గుండా కవాతు నిర్వహించారు. త్వరలో జరగనున్న పంచాయతీ ఎన్నికల నేపథ్యంలో ఎలాంటి అవాంఛనీయ సంఘటనలు చోటుచేసుకోకుండా ముందస్తు చర్యల్లో భాగంగా ఈ కవాతు నిర్వహించినట్లు పోలీసులు తెలిపారు. ఎన్నికల సమయంలో శాంతిభద్రతలకు విఘాతం కలిగించే చర్యలకు పాల్పడితే చట్టప్రకారం చర్యలు తీసుకుంటామని స్పష్టం చేశారు. ఈ సందర్భంగా సర్కిల్ ఇన్‌స్పెక్టర్ గురు ప్రకాష్ మాట్లాడుతూ గ్రామ ప్రజలందరూ ఎలాంటి భయాందోళనలకు గురికాకుండా స్వేచ్ఛగా, నిర్భయంగా తమ ఓటు హక్కును వినియోగించుకోవాలని సూచించారు. ఎన్నికలు ప్రశాంతంగా జరిగేలా పోలీసు శాఖ తరఫున అవసరమైన అన్ని భద్రతా చర్యలు చేపడతామని తెలిపారు. ప్రజలు ఎన్నికల సమయంలో సంయమనం పాటిస్తూ పోలీసులకు సహకరించాలని కోరారు.