పోలవరం రైతులకు సాగు ఖర్చు తగ్గించే మార్గాలపై అవగాహన.. ఎకరానికి రూ.4 వేలు ఆదా చేసే జీరో టిల్లేజ్ విధానంపై ఏఓ శివశంకర్ సూచనలు

చాట్రాయి, ఏలూరు జిల్లా: రైతులకు ఆధునిక సాగు పద్ధతులపై అవగాహన కల్పిస్తూ, పెట్టుబడి ఖర్చులు తగ్గించి అధిక ప్రయోజనాలు పొందేలా వ్యవసాయ శాఖ ఆధ్వర్యంలో చేపడుతున్న పొలం పిలుస్తుంది కార్యక్రమం బుధవారం చాట్రాయి మండలం పోలవరం గ్రామంలో నిర్వహించారు. మండల వ్యవసాయ అధికారి బి. శివశంకర్ ఆధ్వర్యంలో జరిగిన ఈ కార్యక్రమంలో వ్యవసాయ అధికారులు నేరుగా రైతుల పొలాల్లోకి వెళ్లి వరి పంటలను పరిశీలించారు. పంటల పరిస్థితిని క్షేత్రస్థాయిలో అంచనా వేస్తూ చీడపీడల ఉనికిని గుర్తించడం, వాటి నివారణకు తీసుకోవాల్సిన ముందస్తు జాగ్రత్తలపై రైతులకు సమగ్ర అవగాహన కల్పించారు. ఈ సందర్భంగా మండల వ్యవసాయ అధికారి బి. శివశంకర్ మాట్లాడుతూ.. రైతులు సంప్రదాయ సాగు విధానాలకే పరిమితం కాకుండా మారుతున్న వాతావరణ పరిస్థితులకు అనుగుణంగా పంటల సాగులో తగిన మార్పులు చేసుకోవాలని సూచించారు. ప్రకృతి వ్యవసాయానికి ప్రాధాన్యత ఇవ్వడం ద్వారా సాగు ఖర్చులను తగ్గించుకోవడంతో పాటు నేల ఆరోగ్యాన్ని కాపాడుకోవచ్చని వివరించారు. రసాయనాల వినియోగాన్ని విచక్షణతో తగ్గిస్తూ ప్రకృతి సిద్ధమైన సాగు పద్ధతులను ప్రోత్సహించాలని తెలిపారు. ఎల్‌నినో ప్రభావంతో రానున్న రబీ సీజన్‌లో వర్షపాతం, నీటి లభ్యతలో మార్పులు చోటుచేసుకునే అవకాశం ఉన్నందున రైతులు అప్రమత్తంగా ఉండాలని శివశంకర్ సూచించారు. నీటి వినియోగం అధికంగా ఉండే వరి సాగుకు బదులుగా ఆరుతడి పంటల వైపు మొగ్గు చూపాలని, అందుబాటులో ఉన్న నీటి వనరులను దృష్టిలో ఉంచుకొని పంటల ఎంపిక చేసుకోవాలని తెలిపారు. మొక్కజొన్న విత్తనాల కొనుగోలులో అప్రమత్తత అవసరం వరి కోతలు పూర్తిచేసిన రైతులు రబీ సాగుకు సిద్ధమవుతున్న నేపథ్యంలో మొక్కజొన్న విత్తనాల కొనుగోలులో ఏమాత్రం నిర్లక్ష్యం చేయకూడదని ఏఓ స్పష్టం చేశారు. విత్తనాలు కొనుగోలు చేసే ప్రతి రైతు తప్పనిసరిగా దుకాణం వద్ద రశీదు తీసుకోవాలని, సీడ్ మొక్కజొన్న సాగు చేసే రైతులు సంబంధిత కంపెనీల నుంచి ముందుగానే రాతపూర్వక ఒప్పందం పొందాలని సూచించారు. విత్తనాల నాణ్యత, కొనుగోలు వివరాలకు సంబంధించిన ఆధారాలు రైతుల వద్ద ఉండటం భవిష్యత్తులో ఎలాంటి సమస్యలు ఎదురైనా పరిష్కారానికి ఉపయోగపడతాయని వివరించారు. దుక్కి ఖర్చుకు చెక్.. ఎకరానికి రూ.4 వేల వరకు ఆదా వరి కోతల అనంతరం పొలాలను మళ్లీ దున్ని సాగుకు సిద్ధం చేయడం వల్ల రైతులపై అదనపు పెట్టుబడి భారం పడుతోందని, దీనికి ప్రత్యామ్నాయంగా జీరో టిల్లేజ్ విధానాన్ని అనుసరించాలని శివశంకర్ సూచించారు. ఈ పద్ధతిలో పొలాన్ని దున్నకుండానే నేరుగా మొక్కజొన్న సాగు చేపట్టవచ్చని, తద్వారా దుక్కి ఖర్చులు తగ్గి ఎకరానికి సుమారు రూ.4 వేల వరకు ఆదా చేసుకునే అవకాశం ఉంటుందని వివరించారు. సాగు ఖర్చులు పెరుగుతున్న ప్రస్తుత పరిస్థితుల్లో ఇలాంటి ఆధునిక పద్ధతులను రైతులు అందిపుచ్చుకోవాలని పిలుపునిచ్చారు. అలాగే మొక్కజొన్న విత్తనాలు విత్తే ముందే తగిన విత్తనశుద్ధి చర్యలు చేపట్టాలని తెలిపారు. థయామిథాక్సామ్ 19.8 శాతం, సైనట్రానిలిప్రోల్ 19.8 శాతం కలిగిన మందులు, ఇమిడాక్లోప్రిడ్ 48 శాతం మందులతో విత్తనశుద్ధి చేయడం ద్వారా తొలి దశలో పంటను చీడపీడల బారి నుంచి సుమారు 20 రోజుల వరకు కాపాడుకునే అవకాశం ఉంటుందని వివరించారు. రైతులు పంట వేసిన తర్వాత సమస్యలు ఎదురైనప్పుడు స్పందించడం కంటే ముందుగానే నివారణ చర్యలు చేపట్టడం ఎంతో ముఖ్యమని ఏఓ శివశంకర్ పేర్కొన్నారు. వ్యవసాయ శాఖ సూచనలు, శాస్త్రీయ సాగు పద్ధతులను పాటిస్తూ పెట్టుబడి తగ్గింపు, దిగుబడి పెంపుపై దృష్టి సారించాలని రైతులకు సూచించారు.