డిసెంబర్ 4న తిరుపతికి ప్రధాని నరేంద్ర మోదీ..

మూడు రోజుల పాటు అఖిల భారత డీజీపీ, ఐజీపీల సదస్సు తిరుపతి: ప్రధానమంత్రి నరేంద్ర మోదీ డిసెంబర్ 4న తిరుపతిలో పర్యటించనున్నారు. తిరుపతిలో మూడు రోజుల పాటు నిర్వహించనున్న అఖిల భారత పోలీసు డైరెక్టర్ జనరల్‌లు (డీజీపీ), ఇన్‌స్పెక్టర్ జనరల్‌ల (ఐజీపీ) సదస్సులో ఆయన పాల్గొననున్నట్లు సమాచారం. దేశవ్యాప్తంగా వివిధ రాష్ట్రాలు, కేంద్రపాలిత ప్రాంతాలకు చెందిన పోలీసు ఉన్నతాధికారులు ఈ సదస్సుకు హాజరుకానున్నారు. ఈ సదస్సు నేపథ్యంలో పోలీసు ఉన్నతాధికారుల కోసం ప్రత్యేక యోగా కార్యక్రమాలను నిర్వహించేందుకు ఏర్పాట్లు చేస్తున్నారు. ఆయుష్ శాఖ ఆధ్వర్యంలో ఈ కార్యక్రమాలను చేపట్టనున్నారు. విధి నిర్వహణలో ఎదురయ్యే ఒత్తిడిని తగ్గించుకోవడం, శారీరక ఆరోగ్యంతో పాటు మానసిక ప్రశాంతతను పెంపొందించుకోవడంలో యోగా ప్రాధాన్యతను వివరించనున్నారు. ప్రధాని పర్యటన, జాతీయ స్థాయి పోలీసు సదస్సు నేపథ్యంలో తిరుపతిలో భద్రతా ఏర్పాట్లు, ఇతర మౌలిక సదుపాయాల కల్పనపై అధికారులు దృష్టి సారించనున్నారు. దేశ అంతర్గత భద్రత, పోలీసు వ్యవస్థ ఎదుర్కొంటున్న సవాళ్లు, శాంతిభద్రతలు, నేరాల నియంత్రణ వంటి అంశాలపై ఈ సదస్సులో చర్చించే అవకాశం ఉంది.