పేద కుటుంబాలకు అండగా రాంసింగ్ నాయక్.. యువతకు సేవా స్ఫూర్తి

ఇంటి నిర్మాణానికి రేకులు, పైపుల అందజేత.. దశదిన కర్మకు బియ్యం, ఆర్థిక సహాయం

గార్ల, నవంబర్ 11:

నిరుపేద కుటుంబాలకు అండగా నిలుస్తూ సామాజిక సేవా కార్యక్రమాలు నిర్వహిస్తున్న గార్ల మండలం రాంపురం గ్రామానికి చెందిన సర్పంచుల ఫోరం అధ్యక్షుడు రాంసింగ్ నాయక్ పలువురికి సహాయ సహకారాలు అందించారు. ఆర్థిక ఇబ్బందులతో సతమతమవుతున్న కుటుంబాలకు తన వంతు తోడ్పాటు అందిస్తూ మానవతా దృక్పథాన్ని చాటుకున్నారు.

ఈ సేవా కార్యక్రమాల్లో భాగంగా నందిపాటి సామ్రాజ్యం ఇంటి నిర్మాణానికి అవసరమైన సుమారు రూ.15 వేల విలువైన రేకులు, పైపులను అందజేశారు. అలాగే గుండ్లపల్లి కనకరాజు దశదిన కర్మ కార్యక్రమ నిర్వహణ కోసం 50 కిలోల బియ్యంతో పాటు రూ.5 వేల ఆర్థిక సహాయాన్ని అందించారు. ఆపద సమయంలో నిరుపేద కుటుంబాలకు అండగా నిలవాలనే ఉద్దేశంతో ఈ సహాయం చేసినట్లు తెలిపారు.

ఈ సందర్భంగా గ్రామానికి చెందిన యువకులు పాల్గొని రాంసింగ్ నాయక్ అందిస్తున్న సేవా కార్యక్రమాలను అభినందించారు. ఆయన చూపిస్తున్న సేవా మార్గంలో తాము కూడా ముందుకు సాగుతామని, భవిష్యత్తులో పేద కుటుంబాలకు, ఆపదలో ఉన్న వారికి తమ వంతు సహాయ సహకారాలు అందిస్తామని హామీ ఇచ్చారు. సమాజంలో ప్రతి ఒక్కరూ సేవా భావాన్ని అలవర్చుకుని తమకు చేతనైనంత సాయం చేయాలని అభిప్రాయపడ్డారు.

ఇదిలా ఉండగా, గ్రామానికి చెందిన బొట్ల వసంతరావు తన కుమారుడికి వీల్‌చైర్ అవసరమని రాంసింగ్ నాయక్ దృష్టికి తీసుకువచ్చారు. దీనిపై స్పందించిన ఆయన త్వరలోనే వీల్‌చైర్ అందజేస్తానని హామీ ఇచ్చారు.

నిరుపేద కుటుంబాల అవసరాలను గుర్తించి, ఆపద సమయంలో వారికి అండగా నిలుస్తూ సేవా కార్యక్రమాలు నిర్వహించడం అభినందనీయమని స్థానికులు పేర్కొన్నారు. యువత కూడా ఇలాంటి సేవా కార్యక్రమాల్లో భాగస్వాములు కావడం ద్వారా సమాజంలో సేవా స్ఫూర్తి మరింత పెంపొందుతుందని అభిప్రాయపడ్డారు.