బేతుపల్లి చెరువులో ప్రమాదం.. 10 మంది ఎస్‌డీఆర్‌ఎఫ్ సిబ్బంది గల్లంతు
మత్స్యకారుల రక్షణకు వెళ్లిన రెండు బోట్లు అదృశ్యం.. ముగ్గురు మత్స్యకారులు సురక్షితం, మరో ఐదుగురి కోసం సహాయక చర్యలు
ఖమ్మం జిల్లా, సత్తుపల్లి, నవంబర్ 4 (ఎన్ టుడే న్యూస్): ఖమ్మం జిల్లా సత్తుపల్లి మండలంలోని బేతుపల్లి చెరువు వద్ద తీవ్ర ప్రమాదం చోటుచేసుకుంది. చెరువులో చిక్కుకున్న మత్స్యకారులను రక్షించేందుకు వెళ్లిన ఎస్‌డీఆర్‌ఎఫ్ బృందానికి చెందిన రెండు బోట్లు గల్లంతయ్యాయి. వాటిలో ఉన్న 10 మంది సిబ్బంది ఆచూకీ తెలియకపోవడంతో గాలింపు చర్యలు కొనసాగుతున్నాయి.
మత్స్యకారులను రక్షించే క్రమంలో ప్రమాదం
బేతుపల్లి చెరువులో చేపల సొసైటీకి చెందిన ఎనిమిది మంది సభ్యులు చేపల వల కట్టేందుకు వెళ్లి వరద ఉధృతిలో చిక్కుకున్నట్లు సమాచారం. వారిని రక్షించేందుకు ఎస్‌డీఆర్‌ఎఫ్ సిబ్బంది రంగంలోకి దిగారు. తొలుత ముగ్గురు మత్స్యకారులను సురక్షితంగా ఒడ్డుకు చేర్చారు.
మిగిలిన ఐదుగురిని రక్షించేందుకు రెండు బోట్లలో వెళ్లిన 10 మంది ఎస్‌డీఆర్‌ఎఫ్ సిబ్బంది ప్రమాదంలో గల్లంతైనట్లు ప్రాథమిక సమాచారం.
ఉధృతంగా గాలింపు చర్యలు
ఎగువ ప్రాంతాల్లో కురిసిన భారీ వర్షాల కారణంగా బేతుపల్లి చెరువుకు వరద ప్రవాహం పెరిగినట్లు తెలుస్తోంది. గల్లంతైన ఎస్‌డీఆర్‌ఎఫ్ సిబ్బంది ఆచూకీ కోసం మరో బోటు సహాయంతో గాలింపు చర్యలు చేపట్టారు. ఖమ్మం జిల్లా కలెక్టర్ దివాకర్ సహాయక చర్యలను పర్యవేక్షిస్తున్నట్లు సమాచారం.
ఈ ఘటనతో స్థానికంగా తీవ్ర ఆందోళన నెలకొంది. గల్లంతైన సిబ్బంది క్షేమంగా బయటపడాలని స్థానికులు ఆకాంక్షిస్తున్నారు.
