మహాత్మా గాంధీ శాంతి సేన ఆధ్వర్యంలో రక్తదాన శిబిరం
మధిరలో 50 మందికి పైగా రక్తదానం.. రోగులకు పండ్ల పంపిణీ
ఖమ్మం జిల్లా మధిర పట్టణంలో మహాత్మా గాంధీ 157వ జయంతిని పురస్కరించుకుని మహాత్మా గాంధీ శాంతి సేన ఆధ్వర్యంలో శుక్రవారం ప్రభుత్వ వైద్యశాల ప్రాంగణంలో రక్తదాన శిబిరాన్ని నిర్వహించారు. ఈ సందర్భంగా 50 మందికి పైగా సభ్యులు రక్తదానం చేయగా, ప్రభుత్వ వైద్యశాలలో చికిత్స పొందుతున్న రోగులకు పండ్లను పంపిణీ చేశారు.
ఈ కార్యక్రమంలో ప్రభుత్వ వైద్యశాల సూపరింటెండెంట్ డాక్టర్ రవి, వైద్యులు డాక్టర్ అనిల్ కుమార్, డాక్టర్ శ్రీనివాసరావు, సీనియర్ నాయకులు ఎస్. నాగేశ్వరరావు, వాసిరెడ్డి బెనర్జీ, మోదుగు బాబు పాల్గొన్నారు.
ఈ సందర్భంగా మహాత్మా గాంధీ శాంతి సేన కన్వీనర్ మొగిలి శ్రీను మాట్లాడుతూ, అత్యవసర సమయాల్లో రక్తం అవసరమైన రోగులకు ఉపయోగపడేలా రక్తదాన శిబిరాన్ని నిర్వహించడం అభినందనీయమన్నారు. గాంధీ జయంతిని సేవా కార్యక్రమాలతో జరుపుకోవడం ద్వారా సమాజానికి మేలు చేసే కార్యక్రమాన్ని చేపట్టినట్లు తెలిపారు. ప్రజల సమస్యలను గుర్తించి, వాటి పరిష్కారం కోసం పోరాడుతూ ప్రజల పక్షాన నిలవాలని సూచించారు. రక్తదానం చేసేందుకు ముందుకు వచ్చిన దాతలను అభినందించారు.
రక్తదానం ప్రాణదానంతో సమానమని, అత్యవసర పరిస్థితుల్లో రోగుల ప్రాణాలను కాపాడేందుకు మరింత మంది స్వచ్ఛందంగా రక్తదానం చేయడానికి ముందుకు రావాలని మొగిలి శ్రీను పిలుపునిచ్చారు.
