నవంబర్ 15న నల్గొండలో జరిగే భారీ బహిరంగ సభను జయప్రదం చేయండి

రైతులు, వ్యవసాయ కార్మికులు, కూలీలు పెద్ద సంఖ్యలో తరలిరావాలి: సిర్పంగి స్వామి పిలుపు

వలిగొండ, నవంబర్ 5 (ఎన్ టుడే న్యూస్): నల్గొండ జిల్లా కేంద్రంలోని ఎన్జీ కళాశాల మైదానంలో నవంబర్ 15న నిర్వహించనున్న భారీ బహిరంగ సభను జయప్రదం చేయాలని తెలంగాణ వ్యవసాయ కార్మిక సంఘం జిల్లా ఉపాధ్యక్షుడు సిర్పంగి స్వామి పిలుపునిచ్చారు. నవంబర్ 15 నుంచి 18 వరకు నల్గొండలో జరగనున్న ఏఐకేఎస్ అఖిల భారత 36వ జాతీయ మహాసభల సందర్భంగా ఈ బహిరంగ సభ నిర్వహించనున్నట్లు తెలిపారు.

వలిగొండలో బైక్ ర్యాలీ

మహాసభలు, బహిరంగ సభను విజయవంతం చేయాలని కోరుతూ గురువారం వలిగొండ మండల కేంద్రంలో బైక్ ర్యాలీ నిర్వహించారు. ఈ సందర్భంగా సిర్పంగి స్వామి మాట్లాడుతూ.. నవంబర్ 15న జరిగే బహిరంగ సభకు లక్షలాది మంది రైతులు, వ్యవసాయ కార్మికులు, కూలీలు హాజరయ్యేలా ఏర్పాట్లు చేస్తున్నట్లు తెలిపారు. ఏఐకేఎస్ జాతీయ నాయకత్వంతో పాటు వివిధ రాష్ట్రాల నుంచి నాయకులు ఈ సభకు హాజరవుతారని పేర్కొన్నారు.

రైతుల సమస్యలపై జాతీయ స్థాయి చర్చ

2014లో బీజేపీ అధికారంలోకి వచ్చిన తర్వాత రైతులకు వ్యతిరేకంగా పలు చట్టాలు తీసుకొచ్చిందని, దీంతో రైతాంగం, వ్యవసాయ రంగం సంక్షోభాన్ని ఎదుర్కొంటున్నాయని సిర్పంగి స్వామి ఆరోపించారు. పండించిన పంటలకు గిట్టుబాటు ధరలు లభించకపోవడం, సరైన మార్కెట్ సౌకర్యాలు లేకపోవడం, సామాజిక భద్రత కొరవడటం వంటి సమస్యలతో రైతులు ఇబ్బందులు పడుతున్నారని పేర్కొన్నారు.

రైతుల సమస్యలపై ఏఐకేఎస్ జాతీయ స్థాయిలో పలు పోరాటాలు నిర్వహించిందని తెలిపారు. రాబోయే మహాసభల్లో రైతాంగం ఎదుర్కొంటున్న సమస్యలపై చర్చించి భవిష్యత్తు కార్యాచరణను రూపొందించనున్నట్లు వివరించారు. మహాసభలు, బహిరంగ సభ విజయవంతానికి ప్రజలు సంపూర్ణ సహకారం అందించాలని కోరారు.

పాల్గొన్న వివిధ సంఘాల నాయకులు

ఈ కార్యక్రమంలో రైతు సంఘం, వ్యవసాయ కార్మిక సంఘం, కేవీపీఎస్, డీవైఎఫ్‌ఐ, ఎస్‌ఎఫ్‌ఐ తదితర సంఘాల నాయకులు కూర శ్రీనివాస్, కొండే కిష్టయ్య, చీర్క శ్రీశైలం రెడ్డి, కల్కూరి ముత్యాలు, దుబ్బ లింగం, కవిడే సురేష్, వేముల నాగరాజు, గర్దాసు నరసింహ, గూడూరు బుచ్చిరెడ్డి, మంగ బాలయ్య, దయ్యాల మల్లేశం, కందగట్ల సాయి రెడ్డి, కొండూరు సత్తయ్య, భూమి బాల శంకర్, వేముల లక్ష్మయ్య, కొమ్ము స్వామి, పెద్ద బోయిన భీమరాజు, పాలోజు శంకరాచారి, మైసొల్ల నరేందర్, వేముల నరసింహ తదితరులు పాల్గొన్నారు.