అమరవీరుల ఆశయాల సాధనకు ఐక్యంగా ఉద్యమిద్దాం

ప్రజల సమస్యల పరిష్కారం కోసం పోరాటాలను కొనసాగించాలి: ఏఐకేఎంఎస్ జిల్లా సహాయ కార్యదర్శి పుల్లన్న

గంగారం, నవంబర్ 5 (ఎన్ టుడే న్యూస్): దోపిడీ, పీడన, అసమానతలు లేని నూతన సమాజ నిర్మాణం కోసం సాగిన భారత విప్లవోద్యమంలో ప్రాణత్యాగం చేసిన అమరవీరుల ఆశయాలను సాధించేందుకు ప్రజలంతా ఐక్యంగా ఉద్యమించాలని అఖిల భారత రైతుకూలీ సంఘం (ఏఐకేఎంఎస్) జిల్లా సహాయ కార్యదర్శి పుల్లన్న పిలుపునిచ్చారు.

పుట్టల భూపతి తండాలో ముఖ్య కార్యకర్తల సమావేశం

అమరవీరుల స్మారక సభల నిర్వహణలో భాగంగా గురువారం మహబూబాబాద్ జిల్లా గంగారం మండలం పుట్టల భూపతి తండాలో పార్టీ ముఖ్య కార్యకర్తల సమావేశం నిర్వహించారు. ఈ సమావేశంలో పాల్గొన్న కామ్రేడ్ పుల్లన్న మాట్లాడుతూ.. సమాజంలో దోపిడీ, పీడన, అసమానతలను తొలగించి సమానత్వంతో కూడిన నూతన సమాజం కోసం అనేకమంది విప్లవకారులు తమ ప్రాణాలను త్యాగం చేశారని పేర్కొన్నారు.

అమరవీరుల త్యాగాలను మరువకూడదు

అమరవీరుల త్యాగాల ఫలితంగా ప్రజలు అనేక సమస్యల పరిష్కారం కోసం పోరాడి పోడు భూములను సాధించుకున్నారని పుల్లన్న పేర్కొన్నారు. వారి ఆశయాలను ముందుకు తీసుకెళ్లేందుకు ప్రజలంతా ఐక్యంగా ఉండి ఉద్యమాల్లో భాగస్వాములు కావాలని కోరారు.

నవంబర్ 7న పాలడుగు కృష్ణ స్మారక సభ

నవంబర్ 7వ తేదీ సాయంత్రం 7 గంటలకు కొత్తగూడలో కామ్రేడ్ పాలడుగు కృష్ణ స్మారక బహిరంగ సభ నిర్వహించనున్నట్లు పుల్లన్న తెలిపారు. ఈ సభకు ప్రజలు అధిక సంఖ్యలో హాజరై విజయవంతం చేయాలని పిలుపునిచ్చారు.

పాల్గొన్న నాయకులు, కార్యకర్తలు

ఈ సమావేశంలో నాయకులు శ్రీశైలం, నిర్మల, లక్ష్మణ్, చందు, లక్ష్మి, వినోద, శ్రీను, వెంకన్న, సంజీవరావు, ప్రశాంత్, పాండు, వినయ్ తదితరులు పాల్గొన్నారు.