బాలాజీ విద్యాసంస్థల్లో అగ్ని ప్రమాదాలపై అవగాహన కార్యక్రమం

ఫైర్ ఇంజిన్‌తో విద్యార్థులకు ప్రత్యక్ష ప్రదర్శన.. దీపావళిని సురక్షితంగా జరుపుకోవాలని సూచన

నర్సంపేట, నవంబర్ 4 (ఎన్ టుడే న్యూస్): నర్సంపేటలోని బాలాజీ విద్యాసంస్థలకు చెందిన బాలాజీ ఇంటిగ్రేటెడ్ టీచింగ్ పాఠశాలలో అగ్ని ప్రమాదాల నివారణ, భద్రతా చర్యలపై అగ్నిమాపక శాఖ సిబ్బంది అవగాహన కార్యక్రమం నిర్వహించారు.

ఈ కార్యక్రమానికి బాలాజీ విద్యాసంస్థల అధినేత డాక్టర్ ఏ. రాజేంద్రప్రసాద్ రెడ్డి, ట్రెజరర్ వనజ ముఖ్య అతిథులుగా హాజరయ్యారు.

అగ్ని ప్రమాదాలపై ప్రతి ఒక్కరికీ అవగాహన అవసరం

ఈ సందర్భంగా డాక్టర్ ఏ. రాజేంద్రప్రసాద్ రెడ్డి మాట్లాడుతూ.. ప్రస్తుత పరిస్థితుల్లో ప్రతి ఒక్కరికీ అగ్ని ప్రమాదాల నివారణ, అత్యవసర సమయాల్లో తీసుకోవాల్సిన జాగ్రత్తలపై అవగాహన ఉండటం ఎంతో అవసరమన్నారు. దీపావళి పండుగను ప్రమాదాలకు తావులేకుండా, తగిన జాగ్రత్తలు పాటిస్తూ సురక్షితంగా జరుపుకోవాలని సూచించారు.

ఫైర్ ఇంజిన్‌తో ప్రత్యక్ష ప్రదర్శన

ఫైర్ సేఫ్టీ విభాగం ఎస్సై మోహన్ రావు తన సిబ్బందితో కలిసి ఫైర్ ఇంజిన్‌ను పాఠశాలకు తీసుకువచ్చారు. అగ్ని ప్రమాదం సంభవించినప్పుడు తీసుకోవాల్సిన జాగ్రత్తలు, మంటలను అదుపు చేసే విధానాలు, ప్రమాదాల నుంచి రక్షించుకునే మార్గాలను విద్యార్థులకు ప్రత్యక్షంగా ప్రదర్శించి వివరించారు.

అగ్నిమాపక భద్రతపై విద్యార్థుల ప్రదర్శన

ఈ సందర్భంగా విద్యార్థులు అగ్నిమాపక భద్రతకు సంబంధించిన చిత్రపటాలను తీసుకువచ్చి ప్రదర్శించారు. అగ్ని ప్రమాదాల నివారణపై తమకు ఉన్న అవగాహనను ప్రదర్శించారు.

ఈ కార్యక్రమంలో పాఠశాల ప్రిన్సిపల్, ఉపాధ్యాయ బృందం, విద్యార్థినీ విద్యార్థులు పాల్గొన్నారు.