యూసీజీపై ఉన్నత స్థాయి అవగాహన సదస్సు
యూసీజీపై ఉన్నత స్థాయి అవగాహన సదస్సు త్వరలో.. మంత్రులు, శాస్త్రవేత్తలతో చర్చలు
చింతలపూడి నియోజకవర్గ రిపోర్టర్ కుడిపుడి సత్తి బాబు
ప్రజల్లోని అపోహలు తొలగించిన తర్వాతే ప్రాజెక్ట్ ముందుకు: ఎమ్మెల్యే సొంగా రోషన్ కుమార్
ఏలూరు జిల్లా: అండర్ గ్రౌండ్ కోల్ గ్యాసిఫికేషన్ (UCG) ప్రాజెక్ట్‌పై ప్రజల్లో నెలకొన్న అపోహలు, అనుమానాలను నివృత్తి చేసేందుకు రాష్ట్ర ప్రభుత్వం ఉన్నత స్థాయి అవగాహన సదస్సు నిర్వహించేందుకు సన్నాహాలు చేస్తోంది. ఈ సదస్సులో మంత్రులతో పాటు శాస్త్రవేత్తలు, నిపుణులు పాల్గొని ప్రాజెక్ట్ అమలు విధానం, భద్రతా చర్యలపై ప్రజలకు అవగాహన కల్పించనున్నారు.
ఈ నేపథ్యంలో చింతలపూడి ఎమ్మెల్యే సొంగా రోషన్ కుమార్ మంగళవారం విజయవాడ క్యాంపు కార్యాలయంలో ప్రభుత్వ ప్రతినిధిగా రాష్ట్ర మంత్రి కొల్లు రవీంద్రను మర్యాదపూర్వకంగా కలిసి UCG ప్రాజెక్ట్‌కు సంబంధించిన పలు అంశాలపై చర్చించారు.
తన నియోజకవర్గ పరిధిలో అండర్ గ్రౌండ్ కోల్ గ్యాసిఫికేషన్‌పై ప్రజల్లో పలు అనుమానాలు, అపోహలు ఉన్నాయని, వాటిని పూర్తిస్థాయిలో నివృత్తి చేసిన తర్వాతే ప్రాజెక్ట్ ప్రక్రియను ముందుకు తీసుకెళ్లాలని మంత్రి దృష్టికి తీసుకెళ్లినట్లు ఎమ్మెల్యే తెలిపారు.
ప్రజల భద్రతకు ప్రభుత్వం అత్యంత ప్రాధాన్యత ఇస్తుందని, శాస్త్రీయ అధ్యయనాలు, నిపుణుల సూచనలు, ప్రజల అభిప్రాయాలను పరిగణనలోకి తీసుకుంటూ నిర్ణయాలు తీసుకుంటామని ఈ సందర్భంగా మంత్రి కొల్లు రవీంద్ర పేర్కొన్నారు. UCG ప్రాజెక్ట్‌పై ప్రజలకు స్పష్టమైన అవగాహన కల్పించేందుకు త్వరలో నిర్వహించే సదస్సు కీలకంగా మారనుంది.
