వృత్తి విద్యార్థుల ఉద్యోగ శిక్షణను పరిశీలించిన కోనసీమ వొకేషనల్ కమిటీ

ప్రభుత్వ వైద్యశాల, వెన్నెల లేబొరేటరీలో శిక్షణ పొందుతున్న విద్యార్థుల పనితీరుపై సమీక్ష.. 48 రోజుల శిక్షణను సద్వినియోగం చేసుకుని నైపుణ్యాలు పెంపొందించుకోవాలి: జిల్లా వొకేషనల్ సూపర్వైజర్ సింహాద్రి

ఆత్రేయపురం: ఆత్రేయపురం గ్రామంలోని మహాత్మా గాంధీ జూనియర్ కళాశాలకు చెందిన వొకేషనల్ విద్యార్థులు ఉద్యోగ శిక్షణ కార్యక్రమంలో భాగంగా స్థానిక ప్రభుత్వ వైద్యశాల, శ్రీ వెన్నెల లేబొరేటరీలో శిక్షణ పొందుతున్నారు. సెప్టెంబర్ 23వ తేదీ నుంచి కొనసాగుతున్న ఈ శిక్షణ కార్యక్రమాన్ని శుక్రవారం కోనసీమ వొకేషనల్ కమిటీ సభ్యులు పరిశీలించారు.

ఈ సందర్భంగా మల్టీపర్పస్ హెల్త్ వర్కర్ కోర్సుకు చెందిన మొదటి, రెండో సంవత్సరం విద్యార్థులతో పాటు మెడికల్ ల్యాబ్ టెక్నీషియన్ కోర్సుకు చెందిన మొదటి, రెండో సంవత్సరం విద్యార్థుల శిక్షణ తీరును పరిశీలించారు. విద్యార్థులు నిర్వహిస్తున్న రికార్డులను జిల్లా వొకేషనల్ సూపర్వైజర్ సింహాద్రి తనిఖీ చేసి, శిక్షణకు సంబంధించిన పలు అంశాలపై సూచనలు చేశారు.

అనంతరం సింహాద్రి మాట్లాడుతూ.. విద్యార్థులకు అందిస్తున్న 48 రోజుల ఉద్యోగ శిక్షణ కార్యక్రమాన్ని పూర్తిస్థాయిలో సద్వినియోగం చేసుకోవాలని సూచించారు. శిక్షణ సమయంలో కేవలం పాఠ్యాంశాలకే పరిమితం కాకుండా, క్షేత్రస్థాయిలో అవసరమైన వృత్తి నైపుణ్యాలను అభివృద్ధి చేసుకోవాలని తెలిపారు. వైద్య రంగంలో పనిచేసే వారికి సేవా దృక్పథం ఎంతో ముఖ్యమని, బాధ్యతతో విధులు నిర్వర్తించే అలవాటును ఇప్పటి నుంచే పెంపొందించుకోవాలని సూచించారు.

కోర్సు పూర్తయిన అనంతరం మంచి ఉపాధి అవకాశాలను పొందేందుకు ఈ ఉద్యోగ శిక్షణ ఎంతగానో ఉపయోగపడుతుందని పేర్కొన్నారు. శిక్షణ ద్వారా పొందిన అనుభవం భవిష్యత్తులో వృత్తిపరమైన నైపుణ్యాలను మెరుగుపరచుకోవడానికి దోహదపడుతుందని వివరించారు. విద్యార్థులు చూపిస్తున్న ఆసక్తి, పనితీరును అభినందించారు.

ఈ కార్యక్రమంలో మహాత్మా గాంధీ జూనియర్ కళాశాల ప్రిన్సిపాల్ బి.వి.ఆర్. పాల్గొన్నారు.