భార్యకు నరకం చూపి.. మరో మహిళతో సహజీవనం
ప్రైవేట్ టీచర్‌కు 30 రోజుల జైలు శిక్ష
మార్కాపురం జిల్లా / గిద్దలూరు:
సమాజానికి నీతి, నైతిక విలువలు బోధించాల్సిన ఓ ప్రైవేట్ ఉపాధ్యాయుడు కుటుంబ బాధ్యతలను విస్మరించి వివాదంలో చిక్కుకున్నాడు. తాళి కట్టిన భార్యను, కన్న కొడుకును పట్టించుకోకుండా వదిలేసి, మరో మహిళతో సంబంధం కొనసాగిస్తూ మొదటి భార్యను వేధింపులకు గురిచేశాడనే కేసులో చివరకు కోర్టు అతడికి జైలు శిక్ష విధించింది.
వివరాల్లోకి వెళితే.. మార్కాపురం జిల్లా గిద్దలూరు మండలం కె.ఎస్. పల్లి (KS పల్లి) గ్రామానికి చెందిన అమీర్ బాషా ప్రైవేట్ ఉపాధ్యాయుడిగా పనిచేస్తున్నాడు. ఎనిమిదేళ్ల క్రితం నుంచి తన భార్య, కుమారుడిని పట్టించుకోకుండా దూరంగా ఉంటున్నాడని, వారి కనీస అవసరాలకు కూడా ఆర్థిక సహాయం చేయకుండా నిర్లక్ష్యం చేశాడని బాధితురాలు ఆరోపించింది.
భర్త తనను, తన కుమారుడిని పోషించాల్సిన బాధ్యతను విస్మరించడమే కాకుండా మరో మహిళతో అక్రమ సంబంధం పెట్టుకుని ఆమెతో సహజీవనం సాగిస్తున్నాడని బాధితురాలు పేర్కొంది. ఆ సంబంధం ద్వారా వారికి ఓ పాప కూడా జన్మించిందని తెలిపింది.
ఈ పరిణామాల నేపథ్యంలో మొదటి భార్యకు తీవ్ర మానసిక వేదన ఎదురైందని, తనను శారీరకంగా, మానసికంగా వేధింపులకు గురిచేశాడని ఆరోపిస్తూ ఆమె న్యాయస్థానాన్ని ఆశ్రయించింది. తనకు న్యాయం చేయాలని కోరుతూ దాఖలు చేసిన పిటిషన్‌పై కోర్టులో విచారణ కొనసాగింది.
కేసును విచారించిన న్యాయమూర్తి భరత్ చంద్ర, ఇరువర్గాల వాదనలు పరిశీలించిన అనంతరం నిందితుడు అమీర్ బాషాకు 30 రోజుల జైలు శిక్ష విధిస్తూ తీర్పు వెలువరించారు. కోర్టు ఆదేశాల మేరకు పోలీసులు నిందితుడిని అదుపులోకి తీసుకుని మార్కాపురం సబ్‌జైలుకు తరలించారు.
భార్య, కుమారుడి పట్ల నిర్లక్ష్యంగా వ్యవహరించడం, కుటుంబ వివాదంలో కోర్టు శిక్ష విధించడం స్థానికంగా చర్చనీయాంశంగా మారింది. ఉపాధ్యాయ వృత్తిలో ఉన్న వ్యక్తి ఇలాంటి వివాదంలో చిక్కుకోవడంపై స్థానికులు తీవ్రంగా స్పందిస్తున్నారు.
