ఉత్తరాంధ్రకు వర్ష హెచ్చరిక.. 14 నుంచి 17 వరకు వానలు కురిసే అవకాశం
బంగాళాఖాతంలో ఏర్పడనున్న అల్పపీడనం ప్రభావంతో ఉత్తరాంధ్రతో పాటు కోస్తాంధ్ర జిల్లాల్లో వర్షాలు కురిసే అవకాశం ఉందని వాతావరణ శాఖ అంచనా వేసింది. అక్టోబర్ 13 ప్రాంతంలో బంగాళాఖాతంలో అల్పపీడనం ఏర్పడే సూచనలు ఉన్నాయని భారత వాతావరణ శాఖ (ఐఎండీ) వెల్లడించింది.
అల్పపీడనం ప్రభావంతో అక్టోబర్ 14 నుంచి 17 వరకు కోస్తాంధ్రలో పలుచోట్ల వర్షాలు కురిసే అవకాశం ఉందని తెలిపింది. కొన్ని ప్రాంతాల్లో భారీ వర్షాలతో పాటు ఉరుములు, మెరుపులతో కూడిన వానలు పడే సూచనలు ఉన్నాయని హెచ్చరించింది.
విశాఖపట్నం, అనకాపల్లి, విజయనగరం, శ్రీకాకుళం, అల్లూరి సీతారామరాజు జిల్లాల్లో వర్ష ప్రభావం ప్రాంతాల వారీగా మారే అవకాశం ఉందని అధికారులు తెలిపారు. తాజా వాతావరణ పరిస్థితుల ఆధారంగా వర్షాల తీవ్రతపై మరింత స్పష్టత వచ్చే అవకాశం ఉందని పేర్కొన్నారు.
ఉరుములు, మెరుపులతో వర్షాలు కురిసే సమయంలో ప్రజలు అప్రమత్తంగా ఉండాలని అధికారులు సూచించారు. ముఖ్యంగా మత్స్యకారులు సముద్రంలోకి వెళ్లే ముందు వాతావరణ శాఖ జారీ చేసే హెచ్చరికలను గమనించాలని సూచించారు. రైతులు కూడా పంటల రక్షణకు అవసరమైన జాగ్రత్తలు తీసుకోవాలని అధికారులు తెలిపారు.
