జాతీయ బాలల విజ్ఞాన కాంగ్రెస్ రాష్ట్రస్థాయి పోటీలకు శ్రీ వివేకవర్ధిని విద్యార్థినులు

జిల్లాస్థాయిలో ప్రతిభ చాటి రాష్ట్రస్థాయికి ఎంపికైన హిమబిందు, ప్రీతి

కేసముద్రం, నవంబర్ 5 (ఎన్ టుడే న్యూస్): జాతీయ బాలల విజ్ఞాన కాంగ్రెస్ జిల్లా స్థాయి పోటీల్లో ప్రతిభ కనబరిచి రాష్ట్రస్థాయి పోటీలకు ఎంపికైన శ్రీ వివేకవర్ధిని హైస్కూల్‌కు చెందిన తొమ్మిదో తరగతి విద్యార్థినులు బి. హిమబిందు, కె. ప్రీతిలను పాఠశాల కరస్పాండెంట్ చిర్ర యాకాంతం గౌడ్, ఉపాధ్యాయులు గురువారం అభినందించారు. విద్యార్థినులకు మార్గదర్శకత్వం వహించిన గైడ్ టీచర్ మేకల విష్ణును కూడా ప్రశంసించారు.

వ్యర్థాల నుంచి సేంద్రియ ఎరువుల తయారీపై ప్రాజెక్టు

మహబూబాబాద్‌లో బుధవారం నిర్వహించిన 32వ జాతీయ బాలల విజ్ఞాన కాంగ్రెస్ జిల్లా స్థాయి పోటీల్లో హిమబిందు, ప్రీతి ‘జంతు వ్యర్థాలు, వ్యవసాయ వ్యర్థాల నుంచి సేంద్రియ ఎరువుల తయారీ’ అనే వినూత్న ప్రాజెక్టును ప్రదర్శించారు.

జంతు, వ్యవసాయ వ్యర్థాలను వృథా చేయకుండా సద్వినియోగం చేసుకోవడం ద్వారా సేంద్రియ ఎరువులను తయారు చేయవచ్చని, తద్వారా పర్యావరణ పరిరక్షణకు తోడ్పడవచ్చని తమ ప్రాజెక్టు ద్వారా వివరించారు. విద్యార్థినులు రూపొందించిన ఈ ప్రాజెక్టు రాష్ట్రస్థాయి పోటీలకు ఎంపికైంది.

విద్యార్థుల్లో శాస్త్రీయ దృక్పథం పెంపొందించాలి

ఈ సందర్భంగా పాఠశాల కరస్పాండెంట్ చిర్ర యాకాంతం గౌడ్ మాట్లాడుతూ విద్యార్థుల్లో చిన్నతనం నుంచే శాస్త్రీయ దృక్పథం, పరిశోధనాత్మక ఆలోచనా విధానం పెంపొందించాల్సిన అవసరం ఉందన్నారు. పుస్తక జ్ఞానంతోపాటు నిత్యజీవితంలో ఎదురయ్యే సమస్యలకు పరిష్కారాలు కనుగొనేలా విద్యార్థులను ప్రోత్సహించాలని సూచించారు.

హిమబిందు, ప్రీతి రాష్ట్రస్థాయి పోటీల్లోనూ ఉత్తమ ప్రతిభ కనబరిచి మరిన్ని విజయాలు సాధించాలని ఆకాంక్షించారు. విద్యార్థుల విజయానికి కృషి చేసిన గైడ్ టీచర్ మేకల విష్ణుతో పాటు ఉపాధ్యాయులను అభినందించారు.

ఈ కార్యక్రమంలో పాఠశాల ఉపాధ్యాయులు, సిబ్బంది పాల్గొన్నారు.