షూటింగ్‌లో ప్రమాదం.. నటుడు విశాల్‌కు గాయాలు

చెన్నై, సెప్టెంబర్ 18: ప్రముఖ తమిళ నటుడు విశాల్‌ సినిమా షూటింగ్‌లో గాయపడినట్లు కోలీవుడ్‌ వర్గాల్లో సమాచారం వెలువడింది. విశాల్‌ నటిస్తున్న ‘పురుషన్‌’ సినిమా చిత్రీకరణ ప్రస్తుతం గోవాలో జరుగుతోంది. గురువారం ఓ ఫైట్‌ సీక్వెన్స్‌ను చిత్రీకరిస్తుండగా ప్రమాదవశాత్తూ ఆయనకు గాయాలైనట్లు తెలుస్తోంది.

ప్రమాదం జరిగిన వెంటనే చిత్ర బృందం విశాల్‌ను ఆస్పత్రికి తరలించినట్లు సమాచారం. వైద్యుల సూచనల మేరకు ప్రస్తుతం ఆయన విశ్రాంతి తీసుకుంటున్నారని, దీంతో సినిమా షూటింగ్‌ను తాత్కాలికంగా నిలిపివేసినట్లు కోలీవుడ్‌ వర్గాలు చెబుతున్నాయి. అయితే విశాల్‌కు అయిన గాయాల తీవ్రత, చికిత్సకు సంబంధించిన పూర్తి వివరాలు అధికారికంగా వెల్లడికావాల్సి ఉంది. విశాల్‌ త్వరగా కోలుకోవాలని అభిమానులు ఆకాంక్షిస్తున్నారు.