Mahabubabad: నాటుసారా వ్యాపారంపై ఎక్సైజ్ శాఖ దాడులు

6 లీటర్ల నాటుసారా స్వాధీనం.. ఒక మహిళపై కేసు నమోదు

మహబూబాబాద్, నవంబర్ 2 (ఎన్ టుడే న్యూస్):

మహబూబాబాద్ జిల్లా బయ్యారం మండలంలోని పలు గ్రామాల్లో అక్రమ నాటుసారా తయారీ, విక్రయాలపై ఎక్సైజ్ శాఖ అధికారులు సోమవారం దాడులు నిర్వహించారు. సంతులపోడు తండా, కోటగడ్డ, కొత్తపేట గ్రామాల్లో చేపట్టిన తనిఖీల్లో ఒక మహిళ నాటుసారాతో పట్టుబడినట్లు ఎక్సైజ్ సీఐ రాంప్రసాద్ తెలిపారు.

6 లీటర్ల నాటుసారా స్వాధీనం

దాడుల్లో పట్టుబడిన మహిళ వద్ద నుంచి 6 లీటర్ల నాటుసారాను అధికారులు స్వాధీనం చేసుకుని కేసు నమోదు చేశారు. అలాగే గతంలో నాటుసారా కేసుల్లో పట్టుబడిన వ్యక్తులను బయ్యారం తహసీల్దార్ నాగరాజు ఎదుట హాజరుపరిచి బైండోవర్ చర్యలు చేపట్టారు.

అక్రమ కార్యకలాపాలకు పాల్పడితే కఠిన చర్యలు

ఈ సందర్భంగా ఎక్సైజ్ సీఐ రాంప్రసాద్ మాట్లాడుతూ.. ఎవరైనా నాటుసారాను తయారు చేసినా, విక్రయించినా, రవాణా చేసినా ఉపేక్షించేది లేదని హెచ్చరించారు. అక్రమ నాటుసారా కార్యకలాపాలకు పాల్పడే వారిపై చట్టప్రకారం కఠిన చర్యలు తీసుకుంటామని స్పష్టం చేశారు.

ఈ దాడుల్లో ఎక్సైజ్ ఎస్‌ఐ శ్రీనివాస్, హెడ్ కానిస్టేబుల్ లలితారాణి, కానిస్టేబుళ్లు హరీశ్, రియాజ్, బలరాం పాల్గొన్నారు.