H-1B వీసాపై అమెరికా కీలక నిర్ణయం..

H-1B వీసాపై అమెరికా కీలక నిర్ణయం.. మరో ఏడాది $1 లక్ష ఫీజు!
అమెరికన్ ఉద్యోగుల నియామకాలపై కూడా నిఘా

USA / N Today News: H-1B వీసాలకు సంబంధించి అమెరికా ప్రభుత్వం కీలక నిర్ణయం తీసుకున్నట్లు సమాచారం. H-1B వీసా దరఖాస్తులకు సంబంధించిన $1 లక్ష ఫీజు నిబంధనను మరో ఏడాది పాటు కొనసాగించేలా అధ్యక్షుడు డొనాల్డ్ ట్రంప్ ఆదేశాలపై సంతకం చేసినట్లు తెలుస్తోంది.

ఈ నిబంధన ముఖ్యంగా అమెరికా వెలుపల ఉండి, తొలిసారి అమెరికా కంపెనీ ద్వారా H-1B వీసా కోసం దరఖాస్తు చేసుకునే వారికి వర్తించనుంది. దీంతో అమెరికాలో ఉద్యోగ అవకాశాల కోసం ప్రయత్నిస్తున్న విదేశీ నిపుణులపై, ముఖ్యంగా భారత్ నుంచి వెళ్లే ఉద్యోగ అభ్యర్థులపై ఆర్థిక ప్రభావం పడే అవకాశం ఉంది.

H-1B వీసా ద్వారా అమెరికా కంపెనీలు విదేశీ నిపుణులను ప్రత్యేక నైపుణ్యాలు అవసరమైన ఉద్యోగాల్లో నియమించుకుంటాయి. టెక్నాలజీ, ఇంజినీరింగ్, ఐటీ, ఇతర ప్రత్యేక నైపుణ్య రంగాల్లో ఈ వీసాకు గణనీయమైన డిమాండ్ ఉంది.

అమెరికన్ ఉద్యోగులను తొలగించి వారి స్థానంలో H-1B వీసాదారులను నియమించే సంస్థలపై మరింత నిఘా పెట్టాలని అమెరికా ప్రభుత్వం నిర్ణయించినట్లు సమాచారం. ఉద్యోగ నియామకాల్లో అమెరికా కార్మికులకు ప్రాధాన్యత కల్పించే విధానంలో భాగంగా ఈ చర్యలు చేపడుతున్నట్లు తెలుస్తోంది.

కొత్త నిబంధనల కారణంగా అమెరికా కంపెనీలకు విదేశీ ఉద్యోగులను నియమించుకునే ఖర్చు పెరగడంతో పాటు, H-1B వీసా ఆధారంగా అమెరికాలో ఉద్యోగాలు పొందాలని చూస్తున్న వారికి కూడా అదనపు ఆర్థిక భారం పడే అవకాశం ఉంది.