విద్యుత్ లైన్ల పునరుద్ధరణ పనులపై సీఎండీ పుల్లారెడ్డి సమీక్ష

మిగిలిన పనులను త్వరితగతిన పూర్తి చేయాలని అధికారులకు సూచన

ప్రకాశం జిల్లా (ఎన్ టుడే న్యూస్): ప్రకాశం జిల్లాలో విద్యుత్ లైన్ల పునరుద్ధరణ పనుల పురోగతిని ఏపీసీపీడీసీఎల్ సీఎండీ పుల్లారెడ్డి పరిశీలించారు. మార్కాపురం జిల్లా విద్యుత్ శాఖ సూపరింటెండింగ్ ఇంజినీర్ (ఎస్‌ఈ) ఎస్.ఏ. కరీంతో కలిసి వివిధ ప్రాంతాల్లో చేపట్టిన విద్యుత్ లైన్ల పునరుద్ధరణ పనుల వివరాలను సమీక్షించారు.

ఈ సందర్భంగా ఎస్‌ఈ ఎస్.ఏ. కరీం తనకు కేటాయించిన పరిధిలో ఇప్పటివరకు చేపట్టిన పునరుద్ధరణ పనుల పురోగతిని సీఎండీకి వివరించారు. ఏయే పనులు పూర్తయ్యాయి, ఇంకా ఏయే పనులు మిగిలి ఉన్నాయనే అంశాలపై వివరాలు వెల్లడించారు. విద్యుత్ లైన్ల పునరుద్ధరణకు సంబంధించి చేపట్టిన చర్యలను సీఎండీకి తెలియజేశారు.

అనంతరం పనుల పురోగతిని పరిశీలించిన సీఎండీ పుల్లారెడ్డి, మిగిలి ఉన్న పునరుద్ధరణ పనులను కూడా త్వరితగతిన పూర్తి చేయాలని అధికారులకు సూచించారు. పనుల విషయంలో జాప్యం లేకుండా నిర్దేశించిన లక్ష్యాలకు అనుగుణంగా ముందుకు సాగాలని స్పష్టం చేశారు.

ఈ కార్యక్రమంలో ప్రకాశం జిల్లా విద్యుత్ శాఖ ఎస్‌ఈ కట్టా వెంకటేశ్వర్లు, సంబంధిత అధికారులు, విద్యుత్ శాఖ సిబ్బంది పాల్గొన్నారు.