చిట్యాలలో విషాదం.. రైలుకు ఎదురెళ్లి వ్యక్తి ఆత్మహత్య

ఆర్థిక ఇబ్బందులు, కుటుంబ సమస్యలతో మనస్తాపం చెందినట్లు పోలీసుల వెల్లడి

నల్లగొండ (ఎన్ టుడే న్యూస్):

ఆర్థిక ఇబ్బందులు, కుటుంబ సమస్యలతో ఓ వ్యక్తి ఆత్మహత్య చేసుకున్న విషాద ఘటన చిట్యాల మున్సిపాలిటీ పరిధిలోని శివనేనిగూడెంలో చోటుచేసుకుంది. గ్రామానికి చెందిన కాలేరు రాము (43) శనివారం సాయంత్రం రైలుకు ఎదురుగా వెళ్లి ప్రాణాలు కోల్పోయారు.

పోలీసులు తెలిపిన వివరాల ప్రకారం.. కాలేరు రాము కొంతకాలంగా ఆర్థిక ఇబ్బందులు, కుటుంబ సమస్యలతో సతమతమవుతున్నట్లు తెలిసింది. ఈ సమస్యల కారణంగా తీవ్ర మనస్తాపానికి గురై రైలుకు ఎదురుగా వెళ్లినట్లు నల్గొండ రైల్వే ఎస్సై రాజు తెలిపారు.

ఘటనపై సమాచారం అందుకున్న రైల్వే పోలీసులు వెంటనే సంఘటనా స్థలానికి చేరుకుని వివరాలు సేకరించారు. అనంతరం మృతదేహాన్ని నల్గొండ ప్రభుత్వ ఆసుపత్రికి తరలించి పోస్టుమార్టం నిర్వహించారు. పోస్టుమార్టం అనంతరం మృతదేహాన్ని కుటుంబ సభ్యులకు అప్పగించినట్లు పోలీసులు వెల్లడించారు.

ఈ ఘటనతో శివనేనిగూడెంలో విషాదం నెలకొంది.