జర్నలిస్టుల భావప్రకటనా స్వేచ్ఛకు సుప్రీంకోర్టు కీలక వ్యాఖ్యలు

ప్రభుత్వ విధానాలను విమర్శించే హక్కు పౌరులకు ఉందని స్పష్టం చేసిన న్యాయస్థానం

న్యూఢిల్లీ (ఎన్ టుడే న్యూస్): ప్రభుత్వ విధానాలు, ప్రజాప్రతినిధులు, ప్రభుత్వ అధికారుల చర్యలను విమర్శించే హక్కు పౌరులకు ఉందని సుప్రీంకోర్టు గతంలో పలు తీర్పుల్లో స్పష్టం చేసింది. ప్రజాస్వామ్యంలో భావప్రకటనా స్వేచ్ఛకు రాజ్యాంగంలోని ఆర్టికల్ 19(1)(a) రక్షణ కల్పిస్తుందని పేర్కొంది.

వినోద్ దువా కేసులో ప్రభుత్వ చర్యలను విమర్శించడం మాత్రమే నేరం కాదని, హింసను ప్రేరేపించడం లేదా ప్రజా శాంతికి భంగం కలిగించే ఉద్దేశంతో వ్యవహరించిన సందర్భాల్లోనే సంబంధిత చట్ట నిబంధనలు వర్తిస్తాయని సుప్రీంకోర్టు పేర్కొంది.

అయితే జర్నలిస్టులకు చట్టపరమైన విచారణ నుంచి ప్రత్యేక మినహాయింపు ఉండదని, ఇతర పౌరుల మాదిరిగానే వారు కూడా చట్ట పరిధిలోకి వస్తారని న్యాయస్థానం స్పష్టం చేసింది. జర్నలిస్టులపై నమోదయ్యే కేసులను వాటి వాస్తవాలు, చట్టపరమైన అంశాల ఆధారంగా పరిశీలించాల్సి ఉంటుంది.