MLC ఓటు నమోదుకు మరో అవకాశం.. డిసెంబర్ 10 వరకు గడువు

ఈ నెల 25న ముసాయిదా ఓటర్ల జాబితా ప్రకటన.. 30న తుది జాబితా విడుదల

హైదరాబాద్ (ఎన్ టుడే న్యూస్):

గ్రాడ్యుయేట్ ఎమ్మెల్సీ ఎన్నికల్లో ఓటు హక్కు నమోదు చేసుకోలేకపోయిన అర్హులైన పట్టభద్రులకు ఎన్నికల సంఘం మరో అవకాశం కల్పిస్తోంది. కొత్తగా ఓటు నమోదు చేసుకోవడంతో పాటు ముసాయిదా ఓటర్ల జాబితాపై అభ్యంతరాలు, ఫిర్యాదులు తెలియజేసేందుకు డిసెంబర్ 10వ తేదీ వరకు గడువు ఇవ్వనుంది.

ఈ నెల 25వ తేదీన గ్రాడ్యుయేట్ ఎమ్మెల్సీ ఓటర్ల ముసాయిదా జాబితాను ప్రకటించనున్నారు. జాబితాలో పేర్లు లేని అర్హులైన పట్టభద్రులు ఈ గడువులోగా కొత్తగా దరఖాస్తు చేసుకోవచ్చు. అలాగే జాబితాలో తప్పులు లేదా ఇతర అభ్యంతరాలు ఉన్నవారు కూడా సంబంధిత ఫిర్యాదులు సమర్పించేందుకు అవకాశం కల్పించనున్నారు.

డిసెంబర్ 30వ తేదీన తుది ఓటర్ల జాబితాను ప్రకటించనున్నారు. దీంతో ఇప్పటివరకు ఓటు హక్కు నమోదు చేసుకోని అర్హులైన పట్టభద్రులు ఈ అవకాశాన్ని వినియోగించుకోవాలని సూచిస్తున్నారు.

కాగా, మహబూబ్‌నగర్–రంగారెడ్డి–హైదరాబాద్, వరంగల్–ఖమ్మం–నల్గొండ గ్రాడ్యుయేట్ ఎమ్మెల్సీ నియోజకవర్గాల్లో ఇప్పటివరకు మొత్తం 12,69,781 దరఖాస్తులు వచ్చినట్లు సమాచారం.