హనుమకొండలో అక్రమ మందుల నిల్వల గుట్టురట్టు..

రూ.15 లక్షల విలువైన మందులు స్వాధీనం 

హనుమకొండ జిల్లా, నవంబర్ 8: హనుమకొండ నగరంలోని బాలసముద్రం ప్రాంతంలో అక్రమంగా మందులు నిల్వ ఉంచి విక్రయిస్తున్న వ్యవహారాన్ని అధికారులు వెలుగులోకి తీసుకొచ్చారు. ఎలాంటి ప్రభుత్వ అనుమతి లేకుండానే ఓ నివాస గృహంలో భారీ మొత్తంలో మందులు నిల్వ ఉంచి విక్రయిస్తున్నట్లు గుర్తించిన అధికారులు దాడులు నిర్వహించారు. శనివారం ఔషధ విక్రయదారుల సంక్షేమ సంఘం నాయకులు అందించిన సమాచారం మేరకు ఔషధ నియంత్రణ విభాగం సహాయ సంచాలకురాలు రాజ్యలక్ష్మి ఆధ్వర్యంలో అధికారులు తనిఖీలు చేపట్టారు. ఈ సందర్భంగా నివాస గృహంలో అక్రమంగా నిల్వ ఉంచిన సుమారు రూ.15 లక్షల విలువైన వివిధ రకాల మందులను స్వాధీనం చేసుకున్నారు. ప్రభుత్వ అనుమతి లేకుండా మందుల నిల్వలు, విక్రయాలు సాగిస్తున్న వ్యవహారంపై అధికారులు విచారణ చేపట్టారు. ఈ తనిఖీల్లో ఔషధ తనిఖీ అధికారి జె. కిరణ్ కుమార్ పాల్గొన్నారు. ప్రజల ఆరోగ్య భద్రతకు సంబంధించిన అంశం కావడంతో ఈ వ్యవహారాన్ని అధికారులు తీవ్రంగా పరిగణిస్తున్నారు.