దీప్తి రెడ్డి అవయవ దానం.. పలువురి జీవితాల్లో వెలుగులు

హైదరాబాద్: తీవ్ర అనారోగ్యంతో ఆస్పత్రిలో చికిత్స పొందుతూ బ్రెయిన్ డెడ్‌గా ప్రకటించబడిన వ్యాపారవేత్త దీప్తి రెడ్డి గతంలో చేసిన అవయవ దాన ప్రతిజ్ఞను ఆమె కుటుంబ సభ్యులు గౌరవించారు. ఆమె అవయవాలను దానం చేసేందుకు కుటుంబ సభ్యులు ముందుకు రావడంతో అవయవ దాన ప్రక్రియ పూర్తైంది.

జీవన్‌దాన్, విరాట్ ఫౌండేషన్ సహకారంతో అవయవ దాన ప్రక్రియను నిర్వహించినట్లు సమాచారం. దీప్తి రెడ్డి కుటుంబ సభ్యుల నిర్ణయంతో ఆమె అవయవాలు అవసరమైన వారికి ఉపయోగపడే అవకాశం ఏర్పడింది.

కుటుంబానికి తీవ్ర విషాదాన్ని మిగిల్చిన సమయంలోనూ, ఇతరుల జీవితాల్లో ఆశ నింపేలా అవయవ దానానికి అంగీకరించడం పట్ల పలువురు ప్రశంసలు వ్యక్తం చేస్తున్నారు. అవయవ దానం ద్వారా మరికొందరికి కొత్త జీవితం అందే అవకాశం ఉందని పేర్కొంటున్నారు.

దీప్తి రెడ్డి గతంలోనే అవయవ దానానికి ప్రతిజ్ఞ చేయడం, ఆమె కుటుంబ సభ్యులు ఆ నిర్ణయాన్ని గౌరవించి ముందుకు రావడం అవయవ దానంపై అవగాహన పెంచాల్సిన అవసరాన్ని మరోసారి గుర్తుచేస్తోంది.